خالید سەركار: میوزیك و گۆرانیی كوردی بێناسنامەیە

هەواڵ / که‌لتور :: 17/03/2019‌ :: 301‌ جار بینراوە
مامۆستا خالید سەركاری هونەرمەندی میوزیسیان

دواڕۆژ، چاوپێکەوتنی سامان قوبادی


مامۆستا خالید سەركاری هونەرمەندی موزسیان، لە چاوپێكەوتنێكی دواڕۆژدا دەڵێت: "دەوڵەتانی دراوسێ بە ئارەزووی خۆیان میلۆدی و گۆرانی كوردیان بردووە.....خۆیان كردووە بە خاوەنی. ئەوان گۆرانی و مۆسقای خۆیان پاراستووە، ئێمە ئەمەمان نەكردووە، مۆسیقای كوردی بێناسنامەیە، پێویستە هونەرمەندان لەسەر ئاستی كوردستانی گەورە كۆببنەوە، بۆ ئەوەی ناسنامەیەكی كوردی بۆ هونەری گۆرانی و میوزیك دابنێن".

دواڕۆژ: دوای نیوسەدە خزمەتكردن، ئێستای میوزیك و گۆرانیی كوردی چۆن هەڵدەسەنگێنیت؟

خالید سەركار: لە ئاواز و میلۆدی و جۆری ئەداكردن و تێكستدا گۆڕانكاریی روویداوە، هەروەها لە تەكنیك و جۆری تۆماركردن بەراورد بەو سەردەمەی ئێمە لە ساڵانی شەست و حەفتاكان، جیاوازیی زۆرە. لەودەمەدا تۆماركردن لە ژوورێكدا زۆر سادە بوو، دەبوایە هەموومان لەناو ستۆدیۆكەدا ئامادەبووینایە و هیچ هەڵەیەكمان نەكردایە، چونكە دەنگەكە هەمووی تۆمار دەكرا. میلۆدییەكان لەو سەردەمەدا جۆرێكی تر بوو، هۆنراوەكان زیاتر هۆنراوەی كلاسیكی بوون، بەڵام ئەو كاتە میوزیك و گۆرانی تام و چێژێكی زیاتر و جیاوازی هەبوو، لای گوێگر دەمایە، كە زۆربەیان تائێستا خەڵك گوێیان لێ دەگرن. 

دواڕۆژ: زۆربەی هونەرمەندەكانی ئێستا هەمان ئاواز و گۆرانییەكانی سەردەمی ئێوە دەڵێنەوە، رات چییە؟ 
خالید سەركار:
خۆزگە وەكو خۆیان بیان وتایەتەوە نەك بەو شكستییەی ئێستا، لەسەر شاشەی تیڤیەكان گەنجەكان گۆرانییەكانی هونەرمەند كەریم كابان و قادر كابان و عوسمان عەلی و ئیبراهیم خەیات-یان وتووەتەوە، جگەلەوەی وەكو خۆی نەیانوتووەتەوە، خراپتریان وتووە و هیچ ئیزافەیەك نەخراوەتە سەری. یەكێك كە لاسایی هونەرمەندێك بكاتەوە، ئەگەر وەكو ئەوی نەڵێت دەبێت باشتری بڵێتەوە، سەردەمانێك مەزهەری خاڵقی گۆرانی محەمەدی ماملێ و سەید عەلی ئەسغەری كوردستانی و حەسەن زیرەك-ی وتووە، بەڵام بەڕاستی ئیزافەیەكی جوان و باشی بۆ كردووە، ستایلێكی تایبەت بە خۆی دروست كردووە كە لاسایی كردنەوەیشە، چونكە هونەرییانە و بە وردی كاریان بۆ كردووە و جوان ئەدای كردووە، نەك وەكو ئەمانەی ئێستا شپرزە و بە ماوەیەكی كەم دەیدەن بە گوێی خەڵیكدا كە جێگەی خۆی ناگرێت، ئەمە زەرەر لە میلۆدی و هونەری كوردی دەدات. 

دواڕۆژ: زۆركات خەڵكی خۆمان بە كەم سەیری میلۆدی و گۆرانیی كوردی دەكەن بەراورد بە فارس و تورك و عەرەب، هۆكاری ئەمە چییە؟
خالید سەركار
: ناهەقمان نییە بە چاوێكی تر سەیری بەرهەمەكانیان بكەین، فارس و تورك و عەرەب مێژوویەكی دوور و درێژی هونەرییان هەیە، چەندین ساڵە خاوەنی كیان و دەوڵەتن، ئێمە كە دەوڵەتمان نییە نازانین چی بكەین و بەرهەمی بهێنین وەكو كرێچی واین، ئەگەر خانووی خۆت بوو ئەوكات بیر لەوە دەكەیتەوە چیت پێویستە، كە دەوڵەتمان هەبوو زۆر شتمان پارێزراو دەبێت. بەهەمانشێوە هونەریش، بەتایبەت گۆرانی و میلۆدی، گەشە دەسێنن و ئەرشیفەكانیش دەمێننەوە، بۆیە دەوڵەتانی دراوسێ بە ئارەزووی خۆیان میلۆدی و گۆرانی كوردیان بردووە كە بەردەوام بە زمانی خۆیان گوێی لێ دەگرینەوە، خۆیان كردووە بە خاوەنی، ئەوان گۆرانی و مۆسقای خۆیان پاراستووە، ئێمە ئەمەمان نەكردووە، مۆسیقای كوردی بێناسنامەیە، پێویستە هونەرمەندان لەسەر ئاستی كوردستانی گەورە كۆببنەوە، بۆ ئەوەی ناسنامەیەكی كوردی بۆ هونەری گۆرانی و میوزیك دابنێن.

دواڕۆژ: ئایا ئەمە پەیوەندیی بەوەوە نییە كە ناوەندێك نییە بۆ پاراستنی بەرهەمی فۆلكلۆری و ئەرشیفكردنیان؟ ئایا بەرهەمەكانی سەردەمی ئێوە رووبەڕووی لەناوچوون نەبوونەتەوە؟ 
خالید سەركار
: ناوچەمان زۆرە و دەوڵەمەندین بە میلۆدی كوردی، لە بادینان گەلێك میلۆدی جوانی وەك لاوكمان گوێ لێ دەبێت، لە گەرمیان قەتار و ئەڵاوەیسی و خاوكەر، هەروەها لە هەورامان، بۆ هەر شوێنێكی ئەم كوردستانە بچین پڕە لە میلۆدی و گۆرانی و تێكستی جوان، جێی داخە زۆربەیان كۆنەكراوەنەتەوە. وەزارەتی رۆشنبیریی دەبوایە دەستی بكردایە بە گەڕان بەدوای گۆرانی و میلۆدی كوردی تا ئەرشیفی بكردایە، بۆ ئەوەی بكرێت بە كتێب، ئەوەی كراوە هەوڵی تاكەكەسییە، نەك حكومەت.

دواڕۆژ: ماوەیەكی زۆرە لە تیڤیەكانەوە دەرناكەویت بۆچی؟ سەرقاڵی چیت؟
خالید سەركار
: تەنها وەكو ژەنین دیار نیم، خوێندكارەكانی خۆمان تیپی مۆسیقای سلێمانی بەڕێوەدەبەن، چەندین ساڵ بە ئامێری كەمان یان عود ئەندامی ئەو تیپە بووم، نزیكەی 15 ساڵە رادەستی خوێندكارەكامان كردووە، لەهەمانكات لەلیژنەی هونەری تیپەكەم كە بەرهەمێك یان ژەنیار و گۆرانیبێژی نوێ دێتە تیپەكەوە، لیژنەكە دەبێت رازیی بێت پاشان كاریان لەگەڵ دەكات. جگەلەوە لەگەڵ مامۆستا فرەنسیس داود و مامۆستا زۆزك قەرەداخی لەسلێمانی پەیمانگەیەكمان بۆ فێربوونی میوزیك دامەزراندووە، ئێواران كاردەكەین بۆ هەر كەسێك كە ئارەزووی فێربوونی میوزیك بێت لە هەر ئامێرێكدا.

دواڕۆژ: بەنیاز نیت ژیانی خۆت بنووسیتەوە؟
خالید سەركار
: زۆربەی بیرەوەری و كارەكانی خۆم نووسیوەتەوە، ئومێدەوارم رۆژێك لە دووتوێی كتێبێكدا چاپی بكەم تا ببێت بە سەرچاوەیەك.



created by Avesta Group and powered by Microsoft Azure