بڕێك ماددەی هۆشبەر لەنێو قوتوی بۆندا دەستی بەسەردا گیرا

هەواڵ / کوردستان :: 17/03/2019‌ :: 252‌ جار بینراوە

دواڕۆژ، پشتیوان جەمال

ئاسایشی سلێمانی بڕێك ماددەی هۆشبەریان لەنێو قوتوی بۆندا گرتووە و كەسێكیشیان لەسەر ئەو رووداوە دەستگیر كردووە.

عەمید جەلال ئەمین، بەڕێوەبەری بەشی ماددە هۆشبەرەكان لەئاسایشی سلێمانی ئەمڕۆ 17ی ئازارای 2019 لە كۆنگرەیەكی رۆژنامەوانیدا رایگەیاند: دوێنێ دوای كۆكردنەوەی زانیاری دەستگیراوە بەسەر بڕێك ماددەی هۆشبەردا كە لەناو قوتوی بۆندا بووە، سەرەتا ئەو ماددەیە لەكاربۆن پێچراوە بۆ ئەوەی بۆن دەرنەكات، پاشان خراوەتە ناو قوتوی بۆنەوە و پێچراوەتەوە بۆ ئەوەی هێزە ئەمنییەكان هەستی پێنەكەن.

ناوبراو روونیكردەوە: لەسەر ئەو رووداوەش كەسێكی بیانی دەستگیركراوە و  دانی بەتاوانەكەیدا ناوە، روونیشی كردەوە: هەرچەندە بڕی ئەو ماددەیەیان نەكێشاوە، بەڵام سەرووی كیلۆیەكە و تریاكە.

پێداچوونەوە: ئارام غەفور



created by Avesta Group and powered by Microsoft Azure