هەڵەبجە: شارێك بێ هۆتێلى گه‌شتیارى

هەواڵ / ئابوری :: 14/03/2019‌ :: 252‌ جار بینراوە

دواڕۆژ، راپۆرتى عەلی حەمە سەعید

سەرەڕای ئەوەی ساڵانە لە بۆنە و جەژنەكان و وەرزە جیاوازەكانی ساڵدا، بە دەیان هەزار گەشتیاری ناوخۆیی و بیانی ڕوو لە ناوچە گەشتوگوزارییەكانی سنوری پارێزگای هەڵەبجە دەكەن، بەڵام نەبوونی هۆتێل و مۆتێل و جێگەی تایبەت بە مانەوەی گەشتیاران، گرفتی بۆ گەشتیاران دروستكردووە، بەرپرسانی گەشتیاری هەڵەبجە پلانەكانیان بۆ چارەسەری ئەو گرفتە دەخەنەڕوو.

لە سنوری پارێزگای هەڵەبجە بەپێی ماستەر پلانی گەشتیاری بەڕێوەبەرایەتی گەشتوگوزاری هەڵەبجە  نزیكەی 30 جێگای گەشتیاری دیاریكراون، كە خۆیان لە ناوچەی گەشتیاریی هاوینە، بەهارە، ئاینی، سیاسی و چارەسەری سروشتی دەبینێتەوە، ئەمەش وایكردووە كە ساڵانە لە بۆنە و جەژنەكاندا زیاتر لە 60 هەزار گەشتیار ڕوو لە ناوچەكە بكەن.

هه‌ڵه‌بجه‌ى شارى بێ ئۆتێلى گه‌شتیارى
فەرەیدون ئەحمەد، یەكێك لەو گەشتیارانەی، كە لەناوچەی گەرمیانەوە سەردانی شارۆچكەی تەوێڵەی كردبوو بە دواڕۆژی راگەیاند: لەگەڵ ئەوەی ناوچەكە خاوەنی سروشتێكی جوان و كەشوهەوایەكی دڵڕفێنە، بەڵام دەبوایە لایەنە پەیوەندیدارەكان زیاتر خزمەتی ئەم جۆرە شوێنانەیان بكردایە و وەك سەرچاوەیەكی گرنگی بەدەستخستنی داهات مامەڵەیان لەگەڵدا بكردایە، بە تایبەت كە گەشتیارێك لە ناوچە دوورەكانەوە دێتە ئەم سنورە دەیەوێت چەند ڕۆژێك بمێنێتەوە، بەڵام نە هۆتێلێك یاخود مۆتێلێكی بوونی نییە ئەمەش دەبێتە هۆی ئەوەی ئەو گەشتیارانەی دێنە ئێرە خێرا لە خەمی گەڕانەوەیاندا بن.

ئاماژەی بەوەشكرد، دەبوو حكومەتی هەرێم بە تایبەت وەزارەتی شارەوانی و گەشتوگوزار هەر زوو لە خەمی كردنەوەی چەند كابینە و ئوتێل و جێگایەكی تایبەت بە مانەوەی گەشتیاراندا بوونایە، چونكە لە هەموو ئەو شارانەی كە خاوەن جێگای گەشتیارین دەبێت شوێنێكی تایبەت بە مانەوەی گەشتیار بوونی هەبێت و گەشتیار دڵنیابێت كە چەند بمێنێتەوە گرفتی بۆ دروست نابێت، بەڵام بەداخەوە ئەمە لە ناوچە گەشتیارییەكانی سنوری پارێزگای هەڵەبجەدا بەدیناكرێت.

تەنیا گەشتیاران نین، نیگەرانن لە خراپی كەرتی گەشتیارى 
ئاسۆ رەوف،  خاوەن دوكان و شوێنی دانیشتنی گەشتیاران لە سەرچاوەی زەڵم بە دواڕۆژی راگەیاند: وەك چۆن گەشتیاران نیگەرانن لە نەبوونی خزمەتگوزاری و نەبوونی جێگەی مانەوەیان، بەهەمان شێوە ئێمەش نیگەرانین لە بەشێكی زۆری گەشتیاران، چونكە ئەو بەشێكی زۆری ئەو گەشتیارانەی كە دێنە ناوچەكە وەك پێویست ژینگە و سروشتی سەیرانگاكە ناپارێزن و لە دوای خۆیان پاشماوەیەكی زۆر جێدەهێڵن یاخود فڕێی دەدەنە ناو ئاوەكەوە بە تایبەت كە ئێستا خەریكە بەرەو وەرزی بەهار و جەژنی نەورۆز دەچین دەبێت گەشتیارانیش رەچاوی پاك و خاوێنی ژینگە بكەن.

ئەوەشی خستەڕوو، وەرگرتنی كرێی دانیشتن و مانەوە لە شوێنێكەوە بۆ شوێنێكی تر جیاوازە ئەوەش بەگوێرەی رووبەر و بەرفراوانی شوێنەكە گۆڕانكاریی بەسەردا دێت و گەشتیاران ئازادن دەمێنەوە یان نا بەزۆر كەس ناچار ناكرێت ئەو بڕە پارەیە بدات، كە دیاریكراوە، هاوكات ئەوەی زیاتر بووەتە جێگەی نیگەرانیی ئێمە، ئەوەیە كە تا ئێستا نەتوانراوە پرۆژەیەكی ئاوەڕۆی گونجاو بۆ سەیرانگای سەرچاوەی زەڵم دروستبكرێت و پاشماوەی گەشتیاران تێكەڵ بە ئاوی خواردنەوەی گوندەكەمان نەبێت، كە گوندی زەڵمە.

بەرپرسانی گەشتوگوزارى سنوره‌كه‌ چی دەڵێن؟ 
وەهاب ئەمین، بەڕێوەبەری گەشتوگوزاری هەڵەبجە، بە دواڕۆژی راگەیاند: ئەركی ئێمەیە كە سەرپەرشتی هەموو شوێنە گەشتیارییەكان بكەین و خزمەتگوزاریشییان بۆ دابین بكەین، بەڵام نەبوونی هۆتێل و جێگای تایبەت بە مانەوەی گەشتیاران لە هەندێك لە شوێنە گەشتیارییەكانی سنوری پارێزگای هەڵەبجە، هەندێك جار پەیوەندی بە شوێنی جوگرافی ناوچەكەوە هەبووە، بە تایبەت شوێنێكی وەك تەوێڵە كە ناوچەیەكی سەخت و شاخاوییە و زەوی پێویست بوونی نییە، نەتوانراوە چ لە لایەن حكومەت یاخود وەبەرهێنەرانەوە هۆتێل دروست بكرێت.

ئاماژەی بەوەشكرد، لە سەیرانگای ئەحمەد ئاوا، نزیكەی 30 كابینەی گەشتیاریمان بۆ مانەوە گەشتیاران دروستكردووە و گەشتیاران دەتوانن سودی لێوەربگرن هەروەها لە ناو هەڵەبجەش هۆتێل هەڵەبجە پاڵاسمان هەیە و بە هەمان شێوەش گەشتیاران دەتوانن تیایدا بمێننەوە، بەڵام بێگومان پێویستمان بە هۆتێل و مۆتێلی زیاتر هەیە لە ناوچەكەدا بونیان هەبێت چونكە زۆربەی ئەو گەشتیارانەی ساڵانە ڕوو لە ناوەكە دەكەن گەشتیاری شارە دوورەكانن.

بەڕێوەبەری گەشتوگوزاری هەڵەبجە ئەوەشی خستەڕوو، رێنمایی پێویستمان بۆ گەشتیارانیش و خاوەن باخ و كەپرەكانیش دەركردووە، لەڕێگەی لیژنەیەكیشەوە بەردەوام چاودێریی شوێنە گەشتیارییەكان دەكەین بۆ ئەوەی لەگەڵ هاتنی جەژنی نەورۆز و پشووەكانی بەهارەوە، چەند كەسانێك لەبەر بەرژەوەندی تایبەتی خۆیان نرخەكان بەرز نەكەنەوە، هەروەها هەركاتێك هەستمان بە زیادەرۆیی كردبێت لە وەرگرتنی پارەی زیادە لەگەشتیاران ڕێوشوێنی پێویستمان گرتووەتە بەر بەداخستنی شوێنەكە و بەردەوامیش دەبین لەو ڕێوشوێنانە.
پ: س.م



created by Avesta Group and powered by Microsoft Azure