چه‌مچه‌ماڵ ناوچه‌یه‌کی ده‌وڵه‌مه‌ند به‌ یه‌ده‌گی نه‌وت و گازی سروشتی

هەواڵ / ئابوری :: 14/03/2019‌ :: 460‌ جار بینراوە
له‌ڕووی سامانی سروشتی چه‌مچه‌ماڵ ده‌کرێت به‌ چه‌ند بلۆکێکه‌وه‌

دواڕۆژ، به‌ختیار شه‌ریف

له‌ سنوری قه‌زای چه‌مچه‌ماڵدا 6 بلۆکی سامانی سروشتی نه‌وت و گازی سروشتی بوونی هه‌یه‌، که‌ یه‌ده‌گیان تریلیۆنه‌ها مه‌تر سێ جا گازی سروشتی و ملیاره‌ها به‌رمیل نه‌وت ده‌بێت.


ئه‌و بلۆکانه‌ بریتین له‌ (‌چه‌مچه‌ماڵ، کێوه‌ چه‌رمه‌ڵه‌، سه‌نگاو، کۆرمۆر، قه‌ره‌هه‌نجیر و بازیان) که‌ له‌چه‌ند کیلۆمه‌ترێکی نزیک قه‌زاکه‌وه‌ ده‌ستپێده‌که‌ن تا ناحیه‌کانی ده‌وروبه‌ری.

بلۆکی چه‌مچه‌ماڵ
"له‌ڕووی سامانی سروشتی به‌تایبه‌تی نه‌وت و گازی سروشتی‌ چه‌مچه‌ماڵ ده‌کرێت به‌ چه‌ند بلۆکێکه‌وه‌" وه‌ك ئه‌وه‌ى شاره‌زاى بوارى كیمیاى نه‌وت باسیده‌كات.
کاوه‌ حه‌مه‌شه‌ریف، خوێندکاری دکتۆرا له‌ بواری کیمیای نه‌وت (Petroleum chemistry) به‌ دواڕۆژی راگه‌یاند: هه‌ر یه‌کێک له‌و بلۆکانه‌ به‌رهه‌مهێنانی تێداده‌کرێت، یاخود یه‌ده‌گن.
له‌باره‌ی بڕ و یه‌ده‌گی سامانی سروشتی سنوره‌که‌وه‌ وتى: "له‌ بلۆکی چه‌مچه‌ماڵدا که‌ له‌گوندی گورگه‌یی و توڕکه‌ و ده‌وروبه‌ری تا گوندی ژاڵه‌ پێکدێت، جگه‌ له‌ نه‌وت کێڵگه‌یه‌کی گه‌وره‌ی گازی سروشتی تێدایه‌ که‌ نزیکه‌ی 800 کیلۆمه‌تر دووجایه‌ و نزیکه‌ی 3 تریلیۆن مه‌تر سێجا گازی یه‌ده‌گی هه‌یه‌".
به‌پێی راپۆرتی سکۆتیا کاپیتاڵ بلۆکی چه‌رمه‌ڵه‌ش‌ که‌ ناحیه‌ی ئاغجه‌له‌ر و ده‌وروبه‌ی ده‌گرێته‌وه‌، پتر له‌ ملیارێک به‌رمیل نه‌وتی یه‌ده‌گی هه‌یه‌.

بلۆکه‌کانی سه‌نگاو
سه‌نگاو له‌ دوو بلۆکی سامانی سروشتی پێکدێت، به‌پێی وته‌ی کاوه‌ حه‌مه‌شه‌ریف: "بلۆکی یه‌کی سه‌نگاو که‌ سه‌نته‌ری ناحیه‌که‌ و دوروبه‌ری ده‌گرێته‌وه‌، پێشبینی ده‌کرێت 800 ملیار مه‌تر سێجا گازی سروشتی تێدابێت و یه‌ده‌گی نه‌وتی بریتییه‌ له‌ 900 ملیار به‌رمیل، له‌ئێستاشدا بیری تێدا لێدراوه‌".
بلۆکی دووی سه‌نگاویش "به‌پێی راپۆرته‌کانی سکۆتیا کاپیتاڵ و سه‌ته‌رلینگ ئینه‌رجی بڕی دوو ملیار به‌رمیل نه‌وتی هه‌یه‌".

بلۆکی کۆرمۆر
بلۆکی کۆرمۆر که‌ ده‌که‌وێته‌ نزیک‌ ناحیه‌ی قادرکه‌ره‌می باشوری چه‌مچه‌ماڵ و به‌ یه‌کێک له‌ ده ‌کێڵگه‌ غازییه‌که‌ی جیهان داده‌نرێت له‌ڕووی یه‌ده‌گی غازی سروشتیه‌وه‌، به‌پێی زانیارییه‌کانی دواڕۆژ به‌پێی رێکه‌وتنێک له‌لایه‌ن حکومه‌تی هه‌رێمی کوردستان و کۆمپانیای (دانه‌غاز)، له‌لایه‌ن ئه‌و کۆمپانیایه‌وه‌ وه‌به‌رهێنانی تێداده‌کرێت و سێ جۆر به‌رهه‌می وه‌کو غازی شل، نه‌فتا (کۆندۆنسێنت)و غازی وشکى لێبه‌رهه‌م دێت که‌ سێیه‌میان ‌له‌ڕێگه‌ی بۆرییه‌وه‌ بۆ وێستگه‌کانی به‌رهه‌مهێنانی کاره‌بای سلێمانی و هه‌ولێر ده‌گوازێته‌وه‌.
به‌پێی وته‌ی ئه‌و خوێندکاره‌ی کیمیای نه‌وت: "بڕی زیاتر له‌ 1.5 تریلیۆن مه‌تر سێجا گازی سروشتی و 200 ملیار به‌رمیل نه‌وتی تێدایه‌ و کۆمپانیای دانه‌غاز و کریسنت ئۆیڵ رۆژانه‌ کاری تێداده‌که‌ن".
ئه‌و شاره‌زایه‌ ئه‌وه‌ش ده‌ڵێت: "له‌ئێستادا رۆژانه‌ 40 هه‌زار به‌رمیل نه‌وتی لێ به‌رهه‌م دێت له‌گه‌ڵ 175 ملیۆن پێ سێجا گازی سروشتیش".
به‌پێی زانیارییه‌کانی دواڕۆژ له‌کێڵگه‌کانی کۆرمۆره‌وه‌ رۆژانه‌ نزیکه‌ی 140 تانکه‌ر له‌ نه‌فتا و گازی شل ده‌رده‌چێت و به‌شێکی که‌می بۆ پێداویستی ناوخۆ و ئه‌وه‌ی دیکه‌ی بۆ وڵاتی ئێران ره‌وانه‌ ده‌کرێت.

بلۆکی قه‌ره‌هه‌نجیر 
ئه‌م کێڵگه‌یه‌ ده‌که‌وێته‌ نزیک ناحیه‌ی قه‌ره‌هه‌نجیر، به‌پێى راپۆتی سه‌ته‌رلینگ ئینه‌رجی پێشبینی دوو ملیار به‌رمیل نه‌وتی یه‌ده‌گ له‌و کێڵگه‌یه‌ ده‌کرێت.

بلۆکی بازیان
ئه‌م بلۆکه‌ له‌ ناحیه‌کانی بازیان و ته‌کیه‌ی کاکه‌مه‌ند و چه‌می رێزان و به‌شێک له‌ ناحیه‌ی ئاغجه‌له‌ر ده‌گرێته‌وه‌ و به‌پێی زانیارییه‌کان ئێستا بیری لێدراوه‌ و بڕی یه‌ده‌گی نه‌وتی ئه‌م بلۆکه‌ش بریتییه‌ له‌ یه‌ك ملیار به‌رمیل.



  • ڕۆژ
  • هەفتە
  • مانگ
created by Avesta Group and powered by Microsoft Azure