لەسەر گەڕاندنەوەی بڕی 78 ملیۆن دینار لە لایەن مامۆستایەکەوە روونکردنەوە دەدرێت

هەواڵ / کوردستان :: 14/03/2019‌ :: 2906‌ جار بینراوە

تاگ :: كوردستانى

دواڕۆژ، محەمەد مستەفا

دوێنێ چوارشەممە 13ی ئازاری 2019، دەنگۆی گەڕاندنەوەی بڕی 78 ملیۆن دینار لە لایەن مامۆستایەکەوە بۆ بانکی رانیە بڵاوکرایەوە کە گوایا بە هەڵە خراوەتەسەر ئەژمارە بانکیەکەی، بەڵام پەروەردە و بانکی رانیە ئەو هەواڵە رەتدەکەنەوە و دەڵێن: "هیچ رووداوێکی لەو شێوەیە رووینەداوە".


یوسف ناودەشی، بەرپرسی پەروەردەی رانیە بەدوارۆژی راگەیاند: ئەمڕۆ دەنگۆیەک بڵاوبوویەوە گوایە لە ناحیەی حاجیاوای قەزای رانیە مامۆستایەکی ئافرەت کە هاوکات بەڕێوەبەری خوێندنگایەکی ناحیەکەیە، بڕی 78 ملیۆن دیناری دوای وەرگرتنی بە هەڵە، گەڕاندووەتەوە بۆ خەزێنەی حکومەت، بەڵام وێڕای رەتکردنەوەی ئەم هەواڵە هاوکات پەروەردەی رانیە رایدەگەیەنێت نە هیچ بڕە پارەیەکی لەم جۆرەی وەرگرتووەتەوە و نە هیچ پارەیەکی لەم جۆرەی خستۆتەسەر هیچ ئەژمارێک.

وتیشی: "هیچ ناوەندێکی خوێندن لە سنوری پەروەردەی رانیە ئەم بڕە پارەیەی وەرنەگرتووە، ئەوەی روویداوە بە جۆرێک بووە کە هەڵەیەک لە رێنوسی چەکی یەکێک لە مامۆستاکان کراوە و هەر ئەوکاتەیش ئەو هەڵەیە چاککراوەتەوە بەر لەوەی بچێت بۆ بانك، ئەمەش شتێکی ئاساییە لە بواری کارگێڕیدا".

باسی لەوەشکرد: بانکی رانیەش رەتیکردۆتەوە کە هیچ بڕە پارەیەکی لەو چەشنەی دابێت بەو مامۆستایە و ئەوان رایان گەیاندووە کە ئەم هەواڵە دورە لە راستییەوە.

 

پ: ن.ر

 



created by Avesta Group and powered by Microsoft Azure