نوێترین لێدوانی تەندروستی سلێمانی سەبارەت بەگەڕانەوەی مووچە دزراوەكەی نەخۆشخانەی شار

هەواڵ / کوردستانی :: 13/03/2019‌ :: 1979‌ جار بینراوە
ساتى گه‌ڕاندنه‌وه‌ى پاره‌كه‌ى نه‌خۆشخانه‌ى شار

دواڕۆژ، پشتیوان جەمال

بەڕێوەبەری گشتی تەندروستی سلێمانی رایدەگەیەنێت: ئەو بڕە پارەیەی لە مووچەی نەخۆشخانەی شار دزرابوو هیچی نەفەوتاوە و ده‌شڵێت: تا ئێوارەی ئەمڕۆ مووچەی پزیشك و كارمەندانی نەخۆشخانەكە دابەشدەكرێت.


د. سەباح نەسرەدین، بەڕێوەبەری گشتی تەندروستی سلێمانی دوای گەڕانەوەی پارەكە بۆ نەخۆشخانەی شار، (ئه‌مڕۆ چوارشه‌ممه‌ 13ى ئازارى 2019) لە كۆنگرەیەكی رۆژنامەوانیدا رایگەیاند: بڕی پارە دزراوەكە ملیارێك و 200 ملیۆن دینار بووە و هیچی نەفەوتاوە، تا ئێوارەش مووچەی نەخۆشخانەكە دابەشدەكرێت.

د. سەباح دەستخۆشی لە هێزە ئەمنییەكانی سلێمانیش كرد بۆ دۆزینەوەی مووچە دزراوەكە و سوپاسی پزیشك و كارمەندانی نەخۆشخانەكەشی كرد بۆ خۆڕاگرتنیان بەرامبەر ئەو رووداوە.

ناوبراو ئاماژەی بەوەكرد: بەمەبەستی لێكۆڵینەوە لەسەر ئەو رووداوە، ژمارەیەك كارمەندی تەندروستی بانگهێشتكراون، بەڵام ئەوە بابەتێكی ئەمنییە و ناتوانن تەدەخولی تێدا بكەن.

بۆ گواستنەوەی ئەو بڕە پارەیەش بەئوتومبیلێكی مینی پاس، بەڕێوەبەری گشتی تەندروستی سلێمانی روونیكردەوە: ئەو پارەیەی نەخۆشخانەی شار زۆرترین بڕە پارەی تەندروستی نییە، بەڵكو ئەوان بڕی زیاتریشیان هەیە و هەموو كاتێكیش بەو شێوەیە گواستراوەتەوە بێ هێزی ئەمنی، چونكە سلێمانی شارێكی ئارامە و تائێستا حاڵەتی لەو شێوەیە رووینەداوە، بەڵام لەمەودوا ئەگەر پێویست بوو هێزی ئەمنی لەگەڵ مووچەدا دەنێرن.

پ: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure