50 ملیۆن دینار بۆ یادی هەڵەبجە تەرخاندەکرێت

هەواڵ / کوردستان :: 12/03/2019‌ :: 258‌ جار بینراوە

دواڕۆژ، عەلی حەمەسەعید


ئەمڕۆ دوا كۆبوونەوەی تایبەت بە ئامادەكارییەكانی 31 ساڵەی یادی كیمیابارانی هەڵەبجە بەڕێوەچوو، وتەبێژی یادەكەش ئاماژە بەوەدەكات، پێدەچێت بڕی 50 ملیۆن دینار بۆ خەرجییەكانی دابینبكرێت.


كامەران مستەفا، وتەبێژی یادی 31 ساڵەی تاوانی كیمیابارانی هەڵەبجە بە دواڕۆژی ڕاگەیاند: ئەمڕۆ لە دیوانی پارێزگای هەڵەبجە بە ئامادەبوونی وەزیری كاروباری شەهیدان و ئەنفالكراوانی حكومەتی هەرێم و لایەنە پەیوەندیدارەكانی هەڵەبجە، كۆتا كۆبوونەوەی تایبەت بە مەراسیمی 31 ساڵەی تاوانی كیمیابارانی هەڵەبجەمان ئەنجامدا و بۆ ئەو مەبەستەش هەموو ئامادەكارییەكان بە كۆتا گەیشتوون و ئەو بانگهێشتنامانەشی كە ئاراستەی كەسایەتی و نوێنەری وڵاتانمانكردوون بەشێكی زۆریان وەڵامیان داوینەتەوە.

ئاماژەی بەوەشكرد: ئەمساڵ جیاواز لە ساڵانی ڕابردوو یادی تاوانی كیمیابارانی هەڵەبجە سێ‌ ڕۆژ بەردەوام دەبێت، بە جۆرێك لە 16/3 یادەكە لەناو هەڵەبجەدا دەكرێتەوە و چەندین چالاكی بەڕێوە دەچن، ڕۆژانی 17/و 18/3 لە قەزاكانی سەیدسادق و شارەزوور و پێنجوێن درێژە بە چالاكییەكانی یادی 31 ساڵەی تاوانی كیمیابارانی هەڵەبجە دەدرێت.

سەبارەت بە دابینكردنی بودجە بۆ بەڕێوەبردنی یادەكە، كامەران مستەفا ئەوەی خستەڕوو، هاوشێوەی ساڵانی رابردوو هەر بڕە پارەیەك خەرجبكەین بۆ ئەنجامدانی چالاكییەكانمان لەلایەن وەزارەتی داراییەوە بۆمان دابیندەكرێت، بۆ ئەمساڵیش پێشبینی دەكەین بڕی 50 ملیۆن دینارمان پێویست بێت و وەزارەتی دارایی بەلێنی دابینكردنی ئەو بڕە پارەیەی پێداوین.


پێداچوونەوە: ئارام غەفور 



created by Avesta Group and powered by Microsoft Azure