فەرماندەی ئۆپراسیۆنەکانی کەرکوک رێگانادات ئاهەنگی نەورۆز لەسەر قەڵا رێکبخرێت

هەواڵ / کوردستان :: 12/03/2019‌ :: 277‌ جار بینراوە

تاگ :: كه‌ركوك

دواڕۆژ، عیماد جەباری

فەرماندەی ئۆپراسیۆنە هاوبەشەکانی کەرکوک رەتیکردوەتەوە رێگا بدەن ئاهەنگی نەورۆز لەسەر قەڵای شارەکە ئەنجام بدرێت، بەرپرسێکی یەکێتیش دەڵێت: "بڕیارە لەو بارەیەوە لەگەڵی کۆببینەوە و سورین لەسەر داگیرساندنی ئاگری نەورۆز لەسەر قەڵا".


(دوێنێ دووشەممە 11ی ئازار) لیوا روکن سەعد حەربیە فەرماندەی ئۆپراسیۆنە هاوبەشەکانی کەرکوک لەگەڵ پارێزگاری کاتی و فەرماندە ئەمنیەکان سەبارەت بەپلانی رۆژانی نەورۆز کۆبووەوە.

جەنگی عیزەدین لێپرسراوی پەیوەندیەکانی مەڵبەندی کەرکوکی یەکێتی بەدواڕۆژی راگەیاند: سەرجەم حزبە کوردستانییەکان بەیەکەوە ئاهەنگی نەورۆز لەسەر قەڵای کەرکوک دەکەینەوە و رێککەوتوین رێوڕەسمی مەرگەساتی هەڵەبجە و یادی راپەڕینیش بەیەکەوە رێکیبخەین.

وتیشی: "لەکۆبونەوەکەی دوێنێیدا فەرماندەی ئۆپراسیۆنەکانی کەرکوک رەزامەندی دەرنەبڕیووە بۆئەوەی ئاهەنگی نەورۆز لەسەر قەڵا بکەینەوە و بیانویشی ئەوەیە کە قەڵا شوێنەوارە و شوێنێکی گشتیە و ناکرێت ئاهەنگی لەسەر بگێڕدرێت".

بەرپرسەکەی یەکێتی جەختیکردەوە: حزبەکەی سورە لەسەر ئەوەی ئاگری نەورۆز لەسەر قەڵا بکاتەوە و ئاڵای کوردستانیش لەو رۆژەدا بەرزبکاتەوە، رۆژی پێنجشەمەیش لەگەڵ ئەو فەرماندەیەی عێراقدا کۆدەبینەوە و ئەم پەیامەی بە ڕوونی پێدەدەین.

ئێوارەی 20ی ئازاری هەموو ساڵێک کەرکوکییەکان ئاگری نەورۆز لەسەر قەڵای کەرکوک دەکەنەوە و ئاهەنگ دەگێڕن، ساڵی رابردوویش کە مەلەفی ئەمنی شارەکە بەدەست دژەتیرۆری عێراقەوە بۆ ئاگری نەورۆز و ئاڵای کوردستان بەرزکرایەوە.

بەڵام لەئێستادا مەلەفی ئەمنی شارەکە لەژێر دەسەڵاتی فەرماندەی ئۆپراسیۆنە هاوبەشەکانە بەفەرماندەیی سەعد حەربیە کە خەڵکی شاری ناسریەیە، لەدوای دەستبەکاربوونیشی فەرماندەی پۆلیسی ئیتیحادی و لیوای 16ی حەشدی تورکمانی وەکو یاریدەدەرانی خۆی دەستنیشانکرد.

 

پ: ک. س



created by Avesta Group and powered by Microsoft Azure