رابەری بزووتنەوە پێشنیارێك بۆ كاتی بەستنی كۆنگرەی حیزبەكەیان دەكات

هەواڵ / کوردستان :: 11/03/2019‌ :: 182‌ جار بینراوە
لۆگۆی بزوتنەوەی ئیسلامی

دواڕۆژ، پشتیوان جەمال

رابەری بزووتنەوەی ئیسلامی پێشنیارێكی بۆ ئەندامانی كۆنفرانسی حیزبەكەیان كرد کە رۆژی 13ی ئایاری ساڵی داهاتوو كۆنگرەی حیزبەكەیان ببەستن.

سەرلەبەیانی (ئەمڕۆ دووشه‌ممه‌ 11ی ئازاری 2019) لە سلێمانی، كۆنفرانسی حەوتەمی بزووتنەوەی ئیسلامی دەستیپێكرد و تا ئێوارەش بەردەوامدەبێت، لەميانی كۆنفرانسەكەدا عیرفان عەلی عەبدولعەزیز، رابەری گشتی بزووتنەوە رایگەیاند: ئەوان هەوڵدەدەن بەشێوەیەكی باشتر لە جاران كاربكەن و پێشنیاریشی بۆ ئەندامانی كۆنفرانس کرد کە رۆژی 13ی ئایاری ساڵی داهاتوو كۆنگرەی حیزبەكەیان ببەستن كە ئەو بەروارەش هاوكاتە لەگەڵ ساڵیادی راگەیاندنی حیزبەكەیان.

عەبدوڵا وەرتی، كارگێڕی مەكتەبی سیاسی بزووتنەوەی ئیسلامی-ش بە دواڕۆژی راگەیاند: لەم كۆنفرانسەدا ئەندامانی مەڵبەند و مەكتەبەكان بەشدارن و دەیانەوێت گڕوتینێكی نوێ بە بزووتنەوە بدەنەوە و وتی: "راستە لە رابردوودا هەڵە و كەموكوڕیمان هەبووە، بەڵام دەمانەوێت ئەمجارە پێداچوونەوەی جددی بكەین و لەكۆنفرانسدا گفتوگۆی تێروتەسەل دەكەین بۆ ئەوەی دوای كۆنفرانس كۆبوونەوەی سەركردایەتی بكەین بۆ جێبەجێكردنی راسپاردەكانی كۆنفرانس". 

پ: چ.ع



created by Avesta Group and powered by Microsoft Azure