لابردنی پاشەکەوتی مووچەو دەرهاوێشتەکانی

هەواڵ / چاوی تۆ :: 09/03/2019‌ :: 217‌ جار بینراوە

ڕزگار حەمەنوری

دوای چاوەڕوانیەکی زۆری مووچەخۆران، سه‌ره‌نجام حکومەتی هەرێم بڕیارێکی گرنگی دا کە لابردنی پاشەکەوتی مووچە بوو، بەمەش دەرگایەکی تری ئومێد لەسەر بژێویی مووچەخۆرانی هەرێم کرایەوە.


ئاشکرایە بازاڕی هەرێمی کوردستان سیستمی (بازاڕی ئازاد)ە و  پرۆژەکانی خزمەتگوزارییش (کەرتی تایبەت) جێبەجێیان دەکات، بۆیە هەندێجار کە حکومەت بڕیارێک دەدات لە بەرژەوەندیی هاووڵاتیان، بەتایبەتی بڕیارە  ئابورییەکان، جێگای داخە (هەندێ لە سەرمایەداران) ئەم هەلە دەقۆزنەوە و لەگەڵ هەر باشبوونێکی باری دارایی مووچەخۆراندا نرخی کاڵا و شتومەک زیاد دەکەن، هەر لە پێداویستیە سەرەتاییەکان تاکو کاڵا گەورەکان، بەمەش بڕیاری باشبوونی باری دارایی مووچەخۆران ئامانجەکەی خۆی ناپێکێ و خەڵک سوودی لێ نابینێی، بۆیە ئەرکی دامودەزگاکانی حکومەتە، بە تایبەتی قائمقامیەتەکان و ناحیەکان، کە لەدوای دەرچوونی ئەم بڕیارەی حکومەتەوە گرنگی تەواو بدەن بە لیژنەکانی ئابوری و چاودێریی نرخی کەلوپەل و کاڵا و تەنانەت کرێی موڵک و .... هتد بکەن و نەهێڵن هیچ بازرگان و سەرمایەدارێک لە گرنگیی ئەم بڕیارە کەم بکاتەوە کە پەیوەندیی بەژیانی سەرجەم خێزانەکانی هەرێمەوە هەیە. 

لەمڕۆ بەدواوە پێویستە حکومەتی هەرێم میکانیزمی گونجاو دابنێت بۆ گەڕانەوەی مووچەپاشەکەوتکراوەکان، لە قۆناغی یەکەمیشدا باشترین بژاردە ئەوەیە کە حکومەت دڵنیایی بداتە مووچەخۆران ئەویش بەکردنی بڕی مووچەی پاشەکەوتکراوی هەر مووچەخۆرێک بە (چەکی بانکی) و دەکرێ پێش کردنی پاشەکەوتەکە بە چەکی بانکی هەر مووچەخۆرێک چەند قەرزاری حکومەتە وەک قەرزەکانی (ئاو، کارەبا، سلفەی خانووبەرەی ئەو چەند مانگەی کە مووچەخۆرەکە نەیداوە ،...هتد) لە مووچە پاشەکەوتەکەی دابشکێنرێ.
خاڵێکی تر کە پێویستە لەمڕۆ بەدواوە حکومەت دیراسەی پێویستی بکات و کاری لەسەر بکات ئەوەیە کە دەرگای دامەزراندن لەسەر گەنجان و لاوانی خوێندەواری ئەم هەرێمە بکاتەوە و بەپێی بەرنامەیەکی گونجاو و بەپێی پێویستی میلاکات و پسپۆریی فەرمانگەکان بەشێکی بەرچاویان دامەزرێنێت، چونکە هەموو دەزانین کێشەی دانەمەزراندنی دەرچووەکان هێندەی کێشەی پاشەکەوتی مووچە کاریگەریی خراپی لەسەر ئایندەی ئەم هەرێمە هەیە.

 



created by Avesta Group and powered by Microsoft Azure