هەڵەبجە بووە خاوەن گەورەترین كۆمەڵگای پەروەردەیی لەسەر ئاستی عێراق

هەواڵ / کوردستان :: 07/03/2019‌ :: 323‌ جار بینراوە

دواڕۆژ، عەلی حەمە سەعید

لەسەر ڕووبەڕی هەشت دۆنم زەوی و بە بڕی حەوت ملیۆن دۆلار، گەورترین كۆمەڵگەی پەروەردەیی لەسەر ئاستی عێراق و هەرێمی كوردستان، لە هەڵەبجە کرایەوە.

دوای ئەوەی زیاد لەساڵێكە لەلایەن ڕێكخراوی كۆیكای كۆریای باشوورەوە بەردی بناغەی ئەو كۆمەڵگە پەروەردەییە دانراوە، ئەمڕۆ بە فەرمی بەڕووی قوتابیاندا كرایەوە.

سۆران عومەر، بەڕێوەبەری گشتی پەروردەی هەڵەبجە بە دواڕۆژی ڕاگەیاند: ئەو كۆمەڵگە پەروەردەییەی ئەمڕۆ لە هەڵەبجە كرایەوە لەلایەن ڕێكخراوی كۆیكای كۆریای باشوورەوە بودجەكەی تەرخانكراوە و وەك دیارییەك بەخشییانە منداڵانی ئەم شارە شەهیدە، كە لەسەر ڕووبەری هەشت دۆنم زەوی بونیادنراوە و بڕی حەوت ملیۆن دۆلاریشی تێچووە و بە وتەی سەرپەرشتیارانی پرۆژەكەش لەسەر ئاستی عێراق و كوردستان گەورەترین كۆمەڵگەی پەروەردەییە.

ئاماژەی بەوەشكرد: ئەم كۆمەڵگە پەروەردەییە قوتابیان لە قۆناغەكانی باخچەی ساوایان تا پۆلی 12ی ئامادەیی لەخۆدەگرێت و سێ یاریگای مۆدێرن و سێ‌ باخچە و چەندین خزمەتگوزاری دیكەی تایبەت بە یاری منداڵان و قوتابیان لە قۆناغە جیاوازەكان لە خۆدەگرێت، بۆیە كردنەوەی ئەم كۆمەڵگا پەروەردەییە هەنگاوێكی گەورە دەبێت لە زیاتر بەرەو پێشبردنی كەرتی پەروەردە لە سنورەكەدا و بەرهەمهێنانی كەسانی پسپۆڕ و شارەزا لە بوارە جیاوازەكاندا.

هەر ئەمڕۆش لەمەراسیمی كردنەوەی ئەو كۆمەڵگە پەروەردەییەدا قوباد تاڵەبانی جێگری سەرۆكی حكومەت لە وتەیەكدا ئاماژەی بەوەكرد، كۆریای باشوور هاوكارێكی گەورەی كەرتی پەروەردە بووە لە هەرێمی كوردستان بەتایبەت كە لە چەند ساڵی پێشوو لە قەیراندا بووین و نەمانتوانی وەك پێویست ئاوڕ لە كەرتی پەروەردە بدەینەوە، بەڵام ئێستا كاتی ئەوە هاتووە لەمەودوا بتوانین لە ڕێگەی ئەم جۆرە كۆمەڵگە پەروەردەییانەوە زیاتر خزمەت بە كەرتی پەروەردە بكەین لە شار و شارۆچكە جیاوازەكانی كوردستان بە گشتی و هەڵەبجە بە تایبەتی.

پێداچوونەوە: ئارام غەفور



created by Avesta Group and powered by Microsoft Azure