هێزه‌كا ئێزدی یێن سه‌ربه‌خۆ دێ پاراستنا شنگال كه‌ن

هەواڵ / کوردستان :: 03/03/2019‌ :: 174‌ جار بینراوە

تاگ :: شەنگال

دواڕۆژ، بورهان یه‌حیا

سه‌رۆكێ پارتا پیێشكه‌فتنا ئێزدییان خویاكر؛ دگه‌ل شیره‌تكارێ ئێمناهییا نه‌ته‌وه‌یی ل ئه‌نجوومه‌نێ وه‌زیران ل ئیراق جۆره‌ رێككه‌ڤتنه‌ك هه‌یه‌ كو هێزه‌كا ئێزدی یێن سه‌ربه‌خۆ شنگالێ بپارێزن.

حه‌یده‌ر شه‌شۆ سه‌رۆكێ پارتا پێشكه‌فتنا ئێزدییان و ئێك ژ فه‌رماندێن له‌شكه‌رێ ئێزدییان (ئه‌ڤرۆ ئێكشه‌مب 3 ئادار 2019) د به‌یاننامه‌یه‌كێ دا راگه‌هاند" هه‌موو نوونه‌رێن پارێن سیاسی و هێزێن له‌شكه‌ری یێن ئێزدییان ل سنۆرێ شنگال ل باره‌گایێ ده‌ڤه‌رداریێ دگه‌ل شیره‌تكارێ ئێمناهییا نه‌ته‌وه‌یی ل ئه‌نجوومه‌نێ وه‌زیران ل ئیراق كۆم بوون و ره‌وشا ئێمناهی و سیاسی ل شنگال هاته‌ به‌حسكرن و هه‌موو لایه‌نێن به‌شدار ل سه‌ر ڤێ چه‌ندێ كۆك بوون كو هێزه‌ك ب ناڤێ پۆلیس یان له‌شكه‌ر ژ ئێزدیێن خۆجهێن ده‌ڤه‌رێ چێبیت داكو پاراستنا ناڤ و ژ ده‌رڤه‌ی شنگال بكه‌ن".

دیاركر" وه‌كو هێزێن سیاسی و له‌شكه‌ری یێن شنگال لسه‌ر ڤێ چه‌ندێ رازی نابین هێزێك ژ ئێزدییان بهێته‌ چێكرن كو ل پاشه‌رۆژێ ب فه‌رمانێ كه‌س و لایه‌نه‌كی لڤین پێ بهێته‌كرن و ب ئازادنه‌ كێم یان زێده‌ بكه‌ن یان ب هه‌لوه‌شینن چونكو ئه‌ڤه‌ نابیته‌ رێكخستن و دێ به‌ره‌لایی په‌یدا بیت و ب باشی نه‌شێین پاراستنا شنگال بكه‌ین".

حه‌یده‌ر شه‌شۆ راگه‌هاند" گه‌نگه‌شه‌یه‌كا ب مفا هاتییه‌كرن و دێ جاره‌كادی هێزێن ئێزدی ل دۆر ڤێ ره‌وشێ دگه‌ل ئێك كۆم بن و بنه‌ ئێك بڕیار و بۆچۆن و دێ داخوازیێن خۆ گه‌هینینه‌ شیره‌تكارێ ئێمناهییا نه‌ته‌وه‌یی ل ئه‌نجوومه‌نێ وه‌زیران ل ئیراق و دووڤدا دێ ل هیڤییێ بین كو بڕیاره‌كا وه‌سا بهێته‌دان كو د به‌رژه‌وه‌ندییا ره‌وشا سیاسی و ئێمناهییا شنگال دا بیت".

ل سنۆرێ شنگال نوكه‌ چه‌ندین هێزێن سیاسی و له‌شكه‌ری هه‌نه‌ كو لبن ئێك چه‌تر كۆم نه‌بووینه‌ و بڕیارێن جودا و هه‌ڤدژی ئێك دده‌ن و نوكه‌كار بۆ رێكخستنا وان دهێته‌كرن.



created by Avesta Group and powered by Microsoft Azure