سلێمانی: چلەی ماتەمینی "خەمخۆری شار" بەڕێوەچوو

هەواڵ / کوردستان :: 02/03/2019‌ :: 447‌ جار بینراوە

تاگ :: سلێمانى

دواڕۆژ، پشتیوان جەمال

لە شاری سلێمانی چلەی ماتەمینی ئەكرەمی ساڵحی رەشە كەسایەتی ناسراوی سلێمانی ناسراو بە "خەمخۆری شار" بەڕێوەچوو، ژمارەیەك كەسایەتی سلێمانیش كۆچكردنی، بە خەسارەت بۆ شارەكە ناودەبەن.


پاشنیوەڕۆی ئەمڕۆ لە هۆتێل گراند میلینیۆم لە شاری سلێمانی بەئامادەبوونی چەندین كەسایەتی، چلەی ماتەمینی ئەكرەم مەحمودی ساڵی رەشە بەڕێوەچوو.

سدیق ساڵح، مێژوونووس و كەسایەتی شاری سلێمانی بەدواڕۆژی راگەیاند: دروستبوونی مرۆڤێك بەو هۆشیاری و لێبڕواییە بۆ شار، مێژوویەكە بۆ خۆی، ئەم كەسایەتییە لەسەر راستەڕێی كاركردنی بوو، بەداخەوە كۆچی دواییەكەی خەسارەتێكی گەورە بوو، چونكە ئەكرەمی ساڵحی رەشە رۆڵێكی گەورەی لەكۆكردنەوەی وێنە و بەڵگەنامەكانی سلێمانی هەبوو.

ئەو كەسایەتییە نازناوی "خەمخۆری شار"ی لێنرابوو، لەوبارەیەوە سدیق ساڵح دەڵێت: "بۆیە ئەو نازناوەی پێبەخشرا، چونكە هەوڵی دەدا لەبواری جیاجیا ئەوەی پەیوەندی بە سلێمانییەوە هەبێت بپارێزێت، هەمیشە لایەنە پەیوەندیدارەكانی لە كەموكوڕییەكان ئاگاداردەكردەوە".

محەمەد مەردان، سەرۆكی ناوەندی كەلەپوری كورد لە سلێمانی بۆ دواڕۆژی روونكردەوە، كۆچكردنی ئەو كەسایەتییە زیانێكی گەورە بوو لە كەلەپوری شارەكە، لەبەرئەوەی هەمیشە خەریكی كۆكردنەوەی بابەتی كەلەپوری بوو، هەمانكات بەشداری ئەو خۆپیشاندانانەشی دەكرد كە بۆ پشتگیری پارچەكانی دیكە دەكران، واتە خەمی گشتی، خەمی ئەكرەمی رەشە بوو.

وەكو چۆن ئەو كەسانە باسی كەسایەتی ئەكرەمی ساڵحی رەشە دەكەن بۆ سلێمانی، ئەنوەری ساڵحی رەشە برای ئەكرەمی رەشە بەدواڕۆژی راگەیاند، كۆچكردنی براكەیان خەسارەتی گەورە بووە لەنێو خانەوادەكەشیان، چونكە هاوكاری هەموویانی كردووە و بەهەمانشێوەی خەمخۆری بۆ شارەكەی، خەمخۆری بنەماڵەكەشی بووە.

ئەكرەمی ساڵحی رەشە، رۆژی 25ی كانوونی دووەمی 1936 لەشاری سلێمانی لەدایكبووە و رۆژی 23ی كانوونی دووەمی ئەمساڵ بەهۆی رووداوی هاتووچۆوە كۆچی دوایی كردووە.


پێداچوونه‌وه‌: ئیحسانی مه‌لا فوئاد



created by Avesta Group and powered by Microsoft Azure