منداڵە ونبووەكەی هەڵەبجە كەی دەگاتەوە هەڵەبجە؟

هەواڵ / کوردستان :: 21/02/2019‌ :: 183‌ جار بینراوە

دواڕۆژ، عەلی حەمەسەعید

دوای ئەوەی ئەمڕۆ لە تارانی پایتەختی ئێران لە مەراسیمێكدا منداڵێكی ونبووی هەڵەبجە بە كەسوكارەكەی شادكرایەوە، دوانیوەڕۆی ئەمڕۆ لە كۆنگرەیەكی ڕوژنامەوانیدا كۆمەڵەی قوربانیانی كیمیابارانی هەڵەبجە وردەكاری زیاتریان لەسەر كەیسەكە ئاشكراكرد.

لە كۆنگرە ڕۆژنامەونییەكەدا، لوقمان عەبدولقادر، سەرۆكی كۆمەڵەی قوربانیانی كیمیابارانی هەڵەبجە ئاماژەی بەوەكرد، بەگوێرەی ئەو بەڵگانەی لای ئەو خێزانە هەبوون لە بارەی منداڵە ونبووەكەیانەوە كە لە شاری كرماشان لێیان ونبووە، هەمان ئەو بەڵگانەن كە لای ئەو خێزانە ئێرانییە هەن كە ئەو منداڵەیان وەرگرتووە و گەورەیانكردووە، ئەوە سەرەڕای ئەوەی كە ئەنجامی پشكنینی DNA ئەوەی دەرخستووە (خەلیل ساڵح) ناسراو بە (محەمەد عەبدوڵا) منداڵی (مەلیحە)یە، بۆیە سەرجەم بەڵگەكان لە %100 ڕاستی دۆسییەكە دەسەلمێنن.

ئاماژەی بەوەشكرد، ئێمە وەك كۆمەڵەی قوربانیان پێمانباشبوو ئەو دۆسیەیە لێرە لە هەرێمی كوردستان یەكلایی بكرایەتەوە و بڕیاری كۆتایی لەبارەوە بدرایە، بەڵام بەهۆی ئەوەی ئەو خێزانەی (خەلیل)یان بە منداڵی خۆیان دەزانی دانیان بە خۆیاندا نەگرت و دڵنیابوون لەوەی كە منداڵی ئەوانە بۆخۆیان ڕۆشتنە ئێران و لەوێ‌ پشكنینەكانیان ئەنجامدا و ئەمڕۆش بە ئامادە بوونی نوێنەری وەزارەتی دەرەوەی ئێران و حكومەتی هەرێم بە دایكی ڕاستەقینەی شاد كرایەوە.

سەرۆكی كۆمەڵەی قوربانیانی كیمیابارانی هەڵەبجە ئەوەشی خستەڕوو، بێگومان لەكاتی گەڕانەوەی خەلیل بۆ هەڵەبجە مەراسیمی تایبەتی بۆ ساز دەكەین، بەڵام تا ئێستا دیار نییە ئاخۆ لە یادی 16/3 بە چ شێوەیەك بەشداری مەراسیمی یادەكە بكات، چونكە ئەوە پەیوەندی بە پارێزگاری هەڵەبجەوە هەیە و ئەو سەرۆكی لیژنەی یادی كیمیارانی هەڵەبجەیە.

پێداچوونەوە: ئارام غەفور 



created by Avesta Group and powered by Microsoft Azure