بەشی كوردی زانكۆی سلێمانی پەیامێك بۆ هاونیشتمانیان هەیە

هەواڵ / کوردستانی :: 21/02/2019‌ :: 207‌ جار بینراوە

تاگ :: كوردستانى

دواڕۆژ، پشتیوان جەمال

سەرۆكی بەشی زمانی كوردی لە كۆلێجی زمان لە زانكۆی سلێمانی داوا لە هاونیشتمانیانی كوردستان دەكات رێز لە زمانی نەتەوە جیاوازەكان بگرن كە ئێستا لە كوردستان دەژین.

ئەمڕۆ 21ی شوباتی 2019 رۆژی زمانی دایكە، بەو بۆنەیەوە بەشی زمانی كوردی مەراسیمێكیان لە هۆڵی پڕۆفیسۆر عیزەدین مستەفا رەسوڵ لە زانكۆی سلێمانی سازكرد، دواتریش چالاكی پێشكەشكردنی خواردنی كوردەواری بەڕێوەچوو.

كاروان ئەحمەد، سەرۆكی بەشی زمانی كوردی لە كۆلێجی زمان لە زانكۆی سلێمانی (ئەمڕۆ 21ی شوباتی 2019) بە دواڕۆژی راگەیاند: وەكو بەشەكەیان پێیان باشبووە لەڕۆژی زمانی دایك ئەم چالاكییە بكەن كە رۆژێكە بۆ خۆگونجاندن لەگەڵ دەنگ و رەنگە جیاوازەكان.


ناوبراو روونیكردەوە: پەیامیان بۆ هاونیشتمانیان ئەوەیە كە ئێستا نەتەوەی دیكەش لەكوردستان دەژین رێز لەزمانەكانیان بگیرێت تا كورد ببێنە نموونەیەكی نوێ بۆ رێزگرتن لە زمانی بەرامبەر، چونكە پێشان لەلایەن نەتەوە سەردەستەكانەوە رێز لە زمانی كوردی نەگیراوە.


مێژووی زمانی دایك دەگەڕێتەوە بۆ چالاكییەك كە خویندكارانی بەنگالی لەساڵی 1952 لە وڵاتی پاكستان كردوویانە كە زمانی ئۆردیو زمانی فەرمی بوو ئەو وڵاتە بوو، بەڵام رێگە بە بەنگالییەكان نەدراوە بەزمانی خۆیان قسە بكەن، بۆیە ئەوانیش لەخۆپیشاندانێكدا داوایان كردووە زمانی بەنگالی ببێتە زمانی فەرمی بەو هۆیەشەوە كۆمەڵکوژ كراون.


ساڵی 1998 هاونیشتمانییەكی بەنگالی كە لەوڵاتی كەنەدا بووە داوای لەسەرۆكی پێشووی نەتەوەیەكگرتووەكان كۆفی ئەنان كردووە كە ئەو رۆژە وەكو رۆژی زمانی دایك بناسێنێت، بۆیە رێكخراوی یونسیكۆی سەر بەنەتەوەیەكگرتووەكانیش ساڵی 1999 رۆژی 21ی شوباتی وەكو رۆژی زمانی دایك چەسپاند و لە 21ی شوباتی 2000یشەوە ساڵانە یادی دەكرێتەوە.

پ: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure