وێنە: مه‌راسیمى شادكردنه‌وه‌ى منداڵێکی هەڵەبجە به‌ دایكی به‌ڕێوه‌چوو

هەواڵ / کوردستان :: 21/02/2019‌ :: 3269‌ جار بینراوە
دیمه‌نێك له‌ مه‌راسیمه‌كه‌

دواڕۆژ، عەلی حەمەسەعید

دوای پشتڕاستکردنەوەی سەرجەم بەڵگەکان و ئەنجامدانی پشکنینی DNA بۆ منداڵێکی ونبووی هەڵەبجە و خێزانێکی سنوری پارێزگاكه، پێشنیوەڕۆی ئەمڕۆ لە تارانی پایتەختی ئێران بە کەسوکارە راستەقینەکەی شادبووەوە.


به‌یانی (ئه‌مڕۆ پێنجشه‌ممه‌ 21ی شوباتی 2019)، مەنزەر عەلی، یەکێک لە ئامادەبووانی مەراسیمی شادکردنەوەی (محەمەد عەبدوڵا) لە تاران بە دواڕۆژی وت: "لە مەراسیمێکی تایبەتدا بە ئامادەبوونی نوێنەرانی حکومەتی هەرێم و وەزارەتی دەرەوەی ئێران و کۆمەڵەی قوربانیان، ئەو منداڵە ونبووەی هەڵەبجە کە پێشتر سەردانی هەڵەبجەی کرد و سکاڵای تۆمارکردبوو، بە دایکی راستەقینەی خۆی شاد کرایەوە کە خەڵکی ناحیەی بیارەن".

ئاماژەی بەوەشکرد: بەگوێرەی وتەی (مەلیحە)ی دایکە راستەقینەکەی (محەمەد عەبدوڵڵا) پێشتر ناوی (خەلیل ساڵح) بووە و لە تەمەنی 10 مانگیدا لە شاری کرماشان لەکاتی چونیان بۆ ئێران لە کیمیابارانەکەی هەڵەبجە منداڵەکەیان لێونبووە.

هاوكات لوقمان عەبدولقادر، سەرۆکی کۆمەڵەی قوربانیانی کیمیابارانی هەڵەبجە بە دواڕۆژی راگەیاند: ئێستا تەنیا دایکی و دوو برای (خەلیل) لە ژیاندا ماون و خێزانەکەی لە ناحیەی بیارە نیشتەجێن، هاوکات لەماوەی 31 ساڵی رابردوودا خەلیل لەلایەن هاووڵاتییەکی شاری شیرازی ئێرانەوە لەئەستۆگیراوە و هەر لەو شارەش گەورە بووە.

لە ئێستادا، خەلیل ساڵح هاوسەرگیری کردووە و منداڵێکی هەیە و خوێندنی تەواوکردووە و خاوەن بڕوانامەی دکتۆرایە لە بواری پزیشکی دادوەریدا، وابڕیاریشە لە چەند رۆژی داهاتوودا لەگەڵ دایکیدا بگەڕێنەوە هەڵەبجە و مەراسیمێکی تایبەتیان بۆ رێکبخرێت.

 

پێداچوونەوە: ئیحسانی مەلا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure