لەسەر هەواڵێكی دواڕۆژ بەڕێوەبەرایەتی كاروباری مین هاتەدەنگ

هەواڵ / کوردستان :: 13/02/2019‌ :: 287‌ جار بینراوە

دواڕۆژ، عەلی حەمە سەعید


دوای ئەوەی دواڕۆژ مەترسییەكی لەسەر شاری هەڵەبجە ئاشكرا كرد بەهۆی مانەوەی حەوت بۆمبی نەتەقیو، بەڕێوەبەرایەتی گشتی كاروباری مین لە سلێمانی هەڵدەستێت بەكاری پێویست.


ئەحمەد فەتاح، بەڕێوەبەری ڕاگەیاندنی بەڕێوەبەرایەتی گشتی كاروباری مینی سلێمانی بە دواڕۆژی ڕاگەیاند: لە ساڵانی ڕابردوو هەركات لەلایەن هاووڵاتیانەوە یاخود دامودەزگا فەرمییەكانەوە ئاگادار كرابێتینەوە لەبارەی بوونی مین و تەقەمەنی و بۆمبی نەتەقیو، دەستبەجێ‌ گەیشتوینەتە شوێنەكە و رێكاری پێویستمان گرتووەتەبەر، بەڵام تائێستا بە فەرمی لەلایەن هیچ هاووڵاتیی و دامودەزگای حكومی و ڕێكخراوێكی هەڵەبجەوە ئاگادار نەكراوینەتەوە بە بوونی مین و تەقەمەنی لە سنورەكەدا.

ئاماژەی بەوەشكرد: ئەم هەواڵەی كە دواڕۆژ لەسەر زاری كۆمەڵەی قوربانیانی كیمیابارانی هەڵەبجەوە بڵاویكردوەتەوە بە بوونی حەوت بۆمبی نەتەقیو لەشاری هەڵەبجە، بە پرسێكی جدی دەزانین و كاری پێویستی لەبارەوە دەكەین، ئەوەش دوای ئەوەی لەڕێگای پارێزگاری سلێمانی و هەڵەبجەوە داوامان لێبكرێت بۆ بەدواداچوون لەسەر بوونی ئەو بۆمبانە و نەهێشتنی مەترسییەكانیان.

ئەو بەرپرسەی بەڕێوەبەرایەتی گشتی كاروباری مین لە سلێمانی ئەوەشی وت: "گومانی تێدا نییە كە مانەوەی ئەو بۆمبانە بە نەتەقیوی مەترسی گەورەیان هەیە چ لەڕووی ئەوەی ڕۆژێك لە ڕۆژان بتەقنەوە و كارەساتێكی نەخوازراو دروست بكەن، یاخود لە ڕووی ئەوەی ئەگەریش نەتەقنەوە ئەوا بە تێپەڕبوونی كات لەگەڵ ئاو و هەوا و خاكی ئەو سنورە تێكەڵ دەبن و كارلێك دەكەن ئەگەریش بۆمبی كیمیایی بن ئەوا بە هەمان شێوە كارەساتی نەخوازراو بەدوای خۆیاندا دەهێنن.

رۆژی (دووشەممە 11ی شوبات) لوقمان عەبدولقادر سەرۆكی كۆمەڵەی قوربانیانی كیمیابارانی هەڵەبجە لە دواڕۆژەوە ئاشكرایكرد كە لە دوای تێپەڕبوونی 31 ساڵ بەسەر كیمیابارانی هەڵەبجەدا هێشتا حەوت بۆمبی نەتەقیو ماونەتەوە كە مەترسییان لێدەكرێت بۆمبی كیمیایی بن.


پێداچوونەوە: ئارام غەفور



created by Avesta Group and powered by Microsoft Azure