په‌رى بۆ رزگاركردنى ژیانى براكه‌ى گورچیله‌ى خۆى پێبه‌خشى

هەواڵ / ڕاپۆرت :: 14/02/2019‌ :: 918‌ جار بینراوە

دواڕۆژ، پشتیوان جەمال

كاتێك زانى ژیانى (هیوا)ى براى له‌ مه‌ترسى نزیكده‌بێته‌وه‌ (په‌رى) گورچیله‌یه‌كى خۆى پێبه‌خشى و هیواى ژیانى پێبه‌خشییه‌وه‌، ئه‌و به‌ ته‌نها نیه‌ به‌ڵكو بەسەدان كەسی دیكە بوونەتە ئەندام لە رێكخراوێكی جەستەبەخشان تا بتوانرێت پاش مردنیان سوود لە به‌شه‌كانى جەستەیان ببینرێت.


به‌ره‌به‌یانى زووى رۆژى چوارشه‌ممه‌ 23ى كانونى دووه‌مى 2019 په‌رى مه‌جید-ى (تەمەن 42 ساڵ) له‌پێناو رزگاركردنى هیوا-ى براى (ته‌مه‌ن 40 ساڵ) له‌ نه‌خۆشخانه‌ى شار له‌ سلێمانى ئاماده‌بوو، تا له‌ نه‌شته‌رگه‌رییه‌كدا یه‌كێك له‌ گورچیله‌كانى خۆى به‌ براكه‌ى ببه‌خشێت.

نه‌شته‌رگه‌رییه‌كه‌ سێیه‌م حاڵه‌تى به‌خشینى گورچیله‌یه‌ كه‌ له‌ماوه‌ى كه‌مى رابردوودا له‌ سلێمانى ئه‌نجامدراوه‌، به‌شێكى كاره‌كانیش له‌لایه‌ن رێكخراوى جه‌سته‌به‌خشانه‌وه‌ رێكخراوه‌.

700 تا 800 ئەندامیان هەیە
فەرهاد قادر، سەرۆكی رێكخراوی جەستەبەخشان لەكوردستان بەدواڕۆژی راگەیاند: تائێستا سێ هەزار فۆرمیان بۆ ئەندامبوون دابەشكردووە و مەرجیشیان ئەوە بووە هەر كەسێك دەبێتە ئەندامیان كەسانی پلەیەك رازی بن، بۆ ئەوەی ئەو كەسە دوای گیانلەدەستداتی بتوانرێت جەستەی ببەخشرێت، بەڵام ئێستا 700 تا 800 ئەندامیان هەیە لەسنوری هەرێمی كوردستان.
رێكخراوی جەستەبەخشان رۆژى 1ى كانونى یه‌كه‌مى 2013 مۆڵەتی وەرگرتووە و تا رۆژی 1ى ئابى 2018 لە سلێمانی ئۆفیسیان هەبووە، بەڵام ئێستا بەهۆی نەبونی بودجە ئۆفیسیان نه‌ماوه‌، بەڵام لە چالاكی بەردەوامن.
جەستەبەخشان لەماوەی كاركردنیان توانیویانە كاری پێدانی گورچیلە بۆ سێ كەس ئەنجام بدەن. پڕۆسەكەش بەجۆرێك بووه‌ كه‌ ئەوان زانیارییان سەبارەت بەئەندامەكانیان هەبووە، خەڵكیش پەیوەندییان پێوەكردوون و ئەگەر زانیبێتیان لەڕووی خوێنەوە بۆ یەكدی دەبن، بەیەكدییان ناساندوون بۆ بەخشینەكە.
فه‌رهاد وتیشی: "تائێستا توانیومانە هەماهەنگی بۆ سێ كەس بكەین، یەكێكیان خوشكێك گورچیلەی بە برایەكی بەخشی، یەكێكیان ژنی پێشمەرگەیەك بوو كەسێكی دیكە گورچیله‌ى پێیبەخشی، له‌ رابردوشدا به‌خشینێكى ترى وامان هه‌بوو".

نه‌خۆشخانه‌یه‌كى تایبه‌ت پێویسته‌
دوو ئەندامی ئەو رێكخراوە لە ساڵانی 2014 و 2015 كۆچی دواییانكردووە، بەڵام بەهۆی نەبوونی نەخۆشخانەوە نەتوانراوە سوود لە جەستەیان ببینرێت، فەرهاد روونیكردەوە: بەداخەوە لەكوردستان نەخۆشخانەیەك نییە بۆ گواستنەوەی ئەندامانی جەستە، پێشتر بەردی بناغەی نەخۆشخانەی 100 قەرەوێڵەیی دانرا، بەڵام تەواونەكرا.
وتیشى: "بە دروستكردنی ئەو نەخۆشخانەیە دەتوانرێت كاتێك كەسێك لەمردن نزیك دەبێتەوە، قسە لەگەڵ كەسوكاری بكرێت و سوود لە حەوت ئەندامی جەستەی وەربگیرێت، چونكە ئێستاش ئەگەر ئەندامێكیان گیانلەدەستبدات بەهۆی نەبوونی نەخۆشخانەی تایبەت بۆ گواستنەوەی ئەندامانی جەستە، ناتوانرێت سوود لە جەستەی ببینرێت".

ئەو كه‌سانه‌ى بۆ بەخشین گرنگن
جەستەبەخشانی بەپلەی سەرەكی چاویان لەو كەسانەیە كە بەهۆی چەند حاڵەتێكەوە رەوانەی چاودێری ورد لە نەخۆشخانەی فێركاری دەكرێن.
فەرهاد وتی: "ئەوانەی بە ڕووداوی هاتووچۆ یان جەڵتەی مێشك دەچنە (غەیبوبە) و تووشی مردنی مێشك دەبن و چاكبوونەوەیان نییە، چونكە لەژێر ئامێرێكن، بۆیە ئەگەر ئەو نەخۆشخانە 100 قەرەوێڵەییە دروستبكرایە دەتوانرا لەو نەخۆشخانەیە بەشێك لە ئەندامانی بگواسترایەتەوە، بەڵام لەم قۆناغەدا ئەگەر كەسەكە گیانی لەدەستدا ناتوانین سوود لە جەستەی ببینین".
یوسف خەلیل (تەمەن 45 ساڵ) فه‌رمانبه‌ره‌ و دوو منداڵی هەیە و ئەندامی رێكخراوی جەستەبەخشانە بۆ دواڕۆژی روونكردەوە، دوای گیانلەدەستدانی ئامادەیە سوود لە جەستەی وەربگیرێت و كەسوكاریشی كێشەیان نییە و وتی: "دەمەوێت بەو هەنگاوەم ببمە فێرگەیەك بۆ كۆمەڵگە، لەجیاتی لەناوبردنی یەكدی، با ژیان بەیەكدی ببەخشینەوە و یەكدیمان خۆشبوێت". 

هەموو ئەندامێكى جەستە دەبەخشرێت
"هەموو ئەندامێكی جەستەی مرۆڤ دەتوانرێت ببەخشرێت، بەڵام نابێت ئەو كەسە بەتەواوی گیانی لەدەستدابێت، بەڵكو ئەو كەسانەی كە مێشكیان مردووە و جەستەیان ماوە، واتە لەچاودێری وردن ئەوكاتە دەتوانرێت بە نەشتەرگەری، سوود لە جەستەیان وەربگیرێت، پێش گیانلەدەستدانیشی بێگومان دەتوانرێت ئەو كارە بكرێت" وه‌ك ئه‌وه‌ى د. یاد نەقشبەندی، وتەبێژی بەڕێوەبەرایەتی گشتی تەندروستی سلێمانی باسیده‌كات.
ناوبراو باسی ئەو مەرجانەی كرد كە بۆ ئەو مەبەستە دەبێت ئەنجام بدرێت و بۆ دواڕۆژ وتی: "دەبێت بەخشەر ئەندامی رێكخراوێكی ئەو بوارە بێت كە ئێستا هەیە و ناسنامەیان هەبێت و واژوویان كردبێت، چونكە دوای بەخشینی جەستەیان كەسوكاریشی بۆیان نییە قسەبكەن، لەژێر ركێفی وەزارەتی تەندروستی بێت، بەڵام فرۆشتنی جەستە تاوانە".
نەقشبەندی روونیشیكردەوە: بۆ بەخشینی جەستە دەبێت هاوشێوەی بانكی خوێن، بانكی جەستەش هەبێت، پاشان لە پەرلەمانی كوردستان یاسای بۆ دەربچێت و بڵاوكردنەوەی هۆشیاری تەندروستی كە ئەو پڕۆسەیە بۆ رزگاركردنی ژیانی كەسێك گرنگە.

له‌ رووى ئاینییه‌وه‌ رێگه‌پێدراوه‌
مەلا عەتا پێنجوێنی، جێگری سكرتێری لقی سلێمانی یەكێتی زانایانی ئاینی ئیسلامی كوردستان بۆ دواڕۆژی روونكردەوە كه‌ كەسێك لە دوو ئەندامی جەستەی كە خوای گەورە پێیبەخشیوە ئیسلام رێگەی پێداوە بۆ رزگاركردنی كەسێكی دیكە یەكێكیان ببەخشێت ئەگەر زیانی تەندروستی نەبێت، بە مەرجێك مامەڵەی كڕین و فرۆشتنی پێوەنەكرێت.

بازرگانێكی جەستە دەستگیركرا
ئه‌و كاره‌ ته‌نها له‌ چوارچێوه‌ى به‌خشیندا ئه‌نجامنادرێت، به‌ڵكو هه‌ندێكجار ده‌خرێته‌ چوارچێوه‌ى بازرگانییه‌وه‌ كه‌ رێگه‌پێنه‌دراوه‌ و ده‌خرێته‌ چوارچێوه‌ى تاوانه‌وه‌.
نەقیب سەركەوت ئەحمەد، وتەبێژی پۆلیسی سلێمانی بە دواڕۆژی راگەیاند: هەفتەی رابردوو هێزەكانیان تۆمەتبارێكیان دەستگیركردووە كە هەستابوو بەساختەكردنی بەڵگەنامە و بازرگانیكردن بە ئەندامەكانی جەستەی مرۆڤەوە.
وتیشى: "لەئێستاشدا بەبڕیاری داوەر و بەپێی ماددەكانی (289-298 لەیاسای سزادانی عێراقی و 4 لەیاسای چاندنی ئەندامەكانی لەش) راگیراوە و پەڕاوی لێكۆڵینەوەی بۆ كراوەتەوە".

ته‌ندروستى هه‌ردووكیان باشه‌
نەریمان قادر هاوسەری (په‌رى) بۆ دواڕۆژ وتى: "هیوا ساڵێك لەمەوبەر گورچیلەكانی 20% كاریان ده‌كرد، ئه‌وكاتیش خێزانم ئامادەیی ده‌ربڕى بۆ به‌خشینى گورچیله‌یه‌كى به‌  براكەی، به‌ڵام نه‌شته‌رگه‌رییه‌كه‌ نه‌كرا و دواخرا".
ئه‌وه‌شى وت: به‌ڵام ئەمساڵ دۆخی تەندروستی (هیوا) خراپتربوو و پێیانوت گورچیلەكانی 12% كاردەكەن، جارێكی دیكە خێزانم جەختیكردەوە كە ئامادەیە گورچیلەی خۆی بەبراكەی ببەخشێت، منيش لاريم نەبوو، بۆیە دوای پشكنین لە نەخۆشخانەی شار بەهاوكاری رێكخراوی جەستەبەخشان، پڕۆسەكەیان ئەنجامداوە و ئێستا باری تەندروستی هەردووكیان زۆر باشە.

داڕشتنه‌وه‌: شیروان شه‌ریف



  • ڕۆژ
  • هەفتە
  • مانگ
created by Avesta Group and powered by Microsoft Azure