"لەگوندێكی نزیك سلێمانی دەست بەسەر چەند پارچە زەوییەکدا گیراوە"

هەواڵ / ئابوری :: 12/02/2019‌ :: 503‌ جار بینراوە

دواڕۆژ، پشتیوان جەمال

ژمارەیەك ئەندامی ئەنجومەنی پارێزگای سلێمانی رایدەگەیەنن: لەگوندی كانی شینكە لەنزیك شاری سلێمانی، لەلایەن چەند كەسێكی دیاریكراوەوە دەستبەسەر زەویدا گیراوە و دەفرۆشرێت.


رێبوار ئەحمەد، سەرۆكی فراكسیۆنی گۆڕان لە ئەنجومەنی پارێزگای سلێمانی لە كۆنگرەیەكی رۆژنامەوانیدا رایگەیاند: ماوەی زیاتر لە دوو ساڵە لە گوندی (كانی شینكە) لەنزیك (شاری مامۆستایان) لە شاری سلێمانی چەندین پارچە زەوی لەلایەن چەند كەسێكی دیاریكراو و دیارینەكراوەوە دەستی بەسەردا دەگیرێت و دەكرێتە خانوو.

ناوبراو ئاماژەی بەوەكرد: ئەم بابەتە لەلایەن بەشێك لەئەندامانی ئەنجومەن لەمساڵدا دراوە بە سەرۆكایەتی ئەنجومەن، بەڵام تائێستا وەڵامی نییە، بۆیە داواكارن لایەنە پەیوەندیدارەكان و شارەوانی هەڵوێستیان هەبێت، چونكە ئەو زەوییانە موڵكی گشتیین.

محەمەد رەسوڵ، ئەندامی لیژنەی خزمەتگوزاری و شارەوانی لە ئەنجومەنی پارێزگای سلێمانی رایگەیاند: ئەوانیش ئاگاداری ئەم زیادەڕەوییەن و داواكارن زیادەڕەوییەكان رابگیرێن و ئەو كەسانەشی زیادەڕەوییان كردوە بدرێنە دادگا.

هاوکات محەمەد شێخ وەهاب، ئەندامی لیژنەی خزمەتگوزاری و شارەوانی لە ئەنجومەنی پارێزگای سلێمانی رایگەیاند: كۆمەڵێك چەكدار بێ ئەوەی گوێبدەنە یاسا ئەو زەوییانەیان فرۆشتووە، ئەمڕۆش بۆ ئەو مەبەستە یاداشتێك دەدەنە ئەنجومەن و لەبەداواداچوون بەردەوامدەبن.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure