ئامێدى دناڤبه‌را هێرشێن تركیا و گه‌شتیارێن ئیراقێ دا

هەواڵ / ئابوری :: 5 رۆژ پێش ئێستا‌ :: 94‌ جار بینراوە

دواڕۆژ، دهۆك

ل سنوورێ پارێزگه‌ها دهۆك ئامێدیێ ناڤدارترین جهێن گه‌شتوگۆزارى هه‌نه وه‌ك؛ سۆلاڤ، ئێنیشكێ، ئاشه‌وا، سه‌رسنك، چیایێ گاره‌، شێرانكێ، بالندا و گه‌له‌ك جهێن دى كو سه‌رنجا گه‌شتیارێن ئیراقێ راكێشایه‌‌‌، د هه‌مان ده‌مدا پترین گوندێن وێ قه‌زایێ و جهێن گه‌شتیارى ژ به‌ر هێرشێن تركیا هاتینه‌ چۆلكرن و كاڤلكرن.

عه‌بدولره‌حمان كاره‌یى، نوكه‌ روونشتڤانێ سه‌نته‌ر‌ێ باژارێ دهۆكه‌، 5 ساله‌ نه‌شێت بچیته‌ گۆندێ خوه‌ (كاره)‌ كو دكه‌ڤیته‌ ده‌ڤه‌را به‌راوارى بالا سه‌ر ب قه‌زا ئامێدیێ، ئه‌و دبێژیت: "ژبه‌ر هێرشێن باله‌فڕێن تركیا ئه‌و نه‌شێت بچیته‌ گوندێ خوه‌".

نه‌بتنێ گوندێ كاره‌ 197 گوندێن دى یێن سنوورێ قه‌زا ئامێدیێ ژبه‌ر هێرشێن باله‌فڕێن تركیا و ئالۆزیێن ناڤبه‌را په‌كه‌كێ و له‌شكه‌رێن ترك هاتینه‌ چۆلكرن كو پتریا وان دكه‌ڤنه‌ سنوورێ ناحییا كانى ماسێ كو رزگار سدقى ئه‌ندامێ جڤاتا پارێزگه‌ها دهۆك، ئه‌ڤ زانییاریه‌ بۆ دواڕۆژ پشتراستكربوون.

گه‌له‌ك جهێن گه‌شتوگۆزارى یێن ئامێدیێ دكه‌ڤنه‌ وان گوندان و ده‌ڤه‌ران یێن به‌رده‌وام تركیا هێرشان دكه‌ته‌ سه‌ر وه‌ك ده‌ڤه‌را بالندا و به‌روارى بالا، دهه‌مان ده‌مدا تركیا ب ده‌هان له‌شكه‌رێن خوه‌ ل وان ده‌ڤه‌ران به‌لاڤكرینه‌ و هه‌ر كه‌سێ نێزكى وان بوو دێ بیته‌ ئارمانجا هێرشێن باله‌فڕێن تركیا.

رزگار سدقى بۆ دواڕۆژ دازانین:"كێمتر ژ دوو سالان 20 كه‌س ژ به‌ر هێرشێن باله‌فڕێن تركیا ل سنوورێ قه‌زا ئامێدیێ هاتینه‌ شه‌هیدكرن".

ده‌ستپێكا دانانا بنگه‌هێن له‌شكه‌رێن تركیا ل قه‌زا ئامێدیێ ڤه‌دگه‌ریته‌ ئۆپه‌راسیۆنا له‌شكه‌ریا تركیا كو 21-ێ ئادارا 1995 ب پشكداریا 23 هزار له‌شكه‌ران و هه‌موو چه‌كێن گران ل سنوورێ پارێزگه‌ها دهۆك دژى گه‌ریلایێن پارتیا كاركه‌رێن كوردستانێ ئه‌نجامدابوو، وى ده‌مى گه‌له‌ك له‌شكه‌رێن تركیا نه‌ڤه‌گه‌ر‌یانه‌ وه‌لاتێ خوه‌ و ل چه‌ند بنگه‌هێن دیاركرى ب رازیبوونا ئیدارا پارتى دیموكراتى كوردستان ل وى ده‌مى مانه‌ ل پارێزگه‌ها دهۆك.

مه‌زنترین بنگه‌هێن له‌شكه‌ریێن تركیا ل باشورێ كوردستانێ دكه‌ڤنه‌ ناحییا بامه‌رنێ، كانى ماسێ و كۆمه‌لگه‌ها سیریێ كو ب سه‌دان له‌شكه‌ر و تانك و چه‌كێن دى یێن گران دگه‌ل وانه‌.

لدۆر ڤێ مژارێ تووفان ژێهات، ئه‌ندامێ راگه‌هاندنا هێزێن پاراستنا گه‌ل (هه‌په‌گه‌) بۆ دواڕۆژ گۆت:"ئارمانجا تركیا لاوازكرنا هه‌موو ده‌ستكه‌ڤتیێن كوردانه‌، له‌ورا هێرش دكه‌ته‌ سه‌ر ده‌ڤه‌را ئامێدیێ، په‌كه‌كێ بتنێ وه‌ك به‌هانه‌ بۆ هێرشێن خوه‌ بكاردئینیت".

تووفان گۆت ژى:"ئه‌و گوند و ده‌ڤه‌رێن تركیا هێرش دكه‌ته‌ سه‌ر و كه‌سێن سڤیل لێ دكۆژیت، جاره‌كێ بتنێ ژى په‌كه‌كێ ل وان جهان نه‌بووینه‌، ئه‌ز پرسیار دكه‌م ئه‌رێ جاره‌كێ گه‌ریلایه‌ك دگه‌ل وان كه‌سان شه‌هیدبوویه‌ یێن ل قه‌زا ئامێدیێ كه‌ڤتینه‌ به‌رهێرشێن باله‌فڕێن تركیا؟".

ل سنوورێ قه‌زا ئامیێدیێ رۆژ لدووڤ رۆژێ هاتنا گه‌شتیارێن ناڤه‌راست و باشورێ ئیراقێ ب رێكا گرۆپێن گه‌شتیارى زێده‌دبیت، لێ ل گۆره‌ى گۆتنێن به‌رپرسێن گه‌شتوگۆزارا ئامێدیێ ئه‌گه‌ر شه‌ڕ و ئالۆزیێن تركیا وپه‌كه‌كێ ل ده‌ڤه‌را ئامێدیێ ب دوماهیك هاتبان هاتنا گه‌شتیاران بۆ ده‌ڤه‌رێن وان دا گه‌له‌ك زێده‌تر لێهێت.

حه‌مید محه‌مه‌د سالح به‌رپرسێ نڤێسینگه‌ها گه‌شتوگۆزارا سۆلاڤا ئامێدیێ بۆ دواڕۆژ گۆت:"نوكه‌ بتنێ نێزیكى 30 جهێن گه‌شتۆگوزارى ل ئامێدیێ هه‌نه‌ كو مه‌ترسییا هێرشێن باله‌فڕێن تركیا لسه‌ر نینه".

‌ناڤبۆرى زه‌لالكر:" ئه‌گه‌ر مه‌ترسییا هێرشێن باله‌فڕێن تاركیا ل قه‌زا ئامێدیێ نه‌با دا گرۆپێن گه‌شتیارى ده‌مێن خوه‌ ل ئامێدیێ زێده‌كه‌ن و دا رۆژه‌كێ مینه‌ ل ده‌ڤه‌را به‌روارى بالا كو نوكه‌ گرۆپێن گه‌شتیارى بتنێ دوو رۆژان دمینه‌ ل قه‌زا ئامێدیێ".

گه‌له‌ك جهێن گه‌شتوگۆزارى یێن وه‌زرێ زڤستانێ دكه‌ڤنه‌ سنوورێ ناحییا كانى ماسێ ل ده‌ڤه‌را به‌ر‌وارى بالا، لێ گه‌شتیار بۆ گه‌شتێن ناڤ به‌فرێ بتنێ دچن چایێ گاره‌.

ل گۆره‌ى گۆتنێن به‌رپرسێ نڤێسینگه‌ها گه‌شتوگۆزارا سۆلاڤێ:"ژ 15-ێ كانوونا ئێكێ یا سالا ده‌ربازبووى تا 10 كانوونا دووێ یا ئه‌ڤ ساله‌ 45 هزار گه‌شتیاران سه‌ره‌دانا ناڤ به‌فرا چیایێ گاره‌ كربوو".

نوكه‌، وه‌لاتیێن قه‌زا  ئامێدیێ هیڤیدكه‌ن ده‌ڤه‌رێن وان ژ شه‌ڕ و ئالۆزیێن ناڤبه‌را تركیا و په‌كه‌كێ رزگارببن، دا بشێن زێده‌تر كه‌رتێ گه‌شوگۆزارێ ل ده‌ڤه‌رێن خوه‌ پێشڤه‌به‌ن، لێ كه‌توار جۆدایه‌ و رۆژ لدووڤ رۆژێ هێرشێن تركیا بۆ سه‌ر ده‌ڤه‌رێن وان زێده‌تر دبن.



  • ڕۆژ
  • هەفتە
  • مانگ
created by Avesta Group and powered by Microsoft Azure