زانیاری نوێ سەبارەت بەو گەنجەی ته‌رمه‌كه‌ی له‌ ماڵه‌كه‌یدا دۆزرایه‌وه‌

هەواڵ / کوردستان :: 11/02/2019‌ :: 4419‌ جار بینراوە

دواڕۆژ، پشتیوان جەمال

پۆلیسی سلێمانی رایدەگەیەنێت، ئەو گەنجەی لەگەڕەكی سەرچناری سلێمانی بەفیشەكی تاپڕ كوژرا، بەوتەی بكوژه‌كه‌ روداوەكە بە "هەڵە" بووە و چاوەڕوانی راپۆرتی پزیشكیشن.


شەوی 7ی شوباتی 2019 لە گەڕەكی سەرچناری شاری سلێمانی تەرمی گەنجێك لە ماڵەكەی خۆیدا دۆزرایەوە كە بەفیشەكی تاپڕ پێكرابوو، هەمان شەویش كەسێك بەتۆمەتی كوشتنی ئەو هاووڵاتییە دەستگیركرا.

نەقیب سەركەوت ئەحمەد، وتەبێژی پۆلیسی سلێمانی (ئەمڕۆ 11ی شوباتی 2019) بەدواڕۆژی راگەیاند "ئەو دوو كەسە دراوسێن، بكوژ تاپڕێكی بردووه‌تە ئەو ماڵه‌ی دراوسێكەیان و وتویەتی هی باوكمە، كاتێك بكوژ چووه‌تەوە بۆ ئەو ماڵە تا تاپڕەكەی وەربگرێتەوە، كوژراوەكە لەكاتی پێدانەوەی تاپڕەكە و وەرگرتنەوەی لەلایەن بكوژەوە فیشەكێك دەرچووە و بەر سەری كوژراوەكە كەوتووە".

ناوبراو وتی "بەوتەی بكوژ رووداوەكە بە هەڵە بووە، چونكە هاوڕێی یەكدی بوون و ئێوارانیش پێكەوە رۆیشتوونەتە دەرەوە، بۆیە تائێستا رووداوەكە دەچێتە چوارچێوەی هەڵە، بەڵام چاوەڕوانی راپۆرتی پزیشكی دادین تا بزانرێت تا چەند مەودای فیشەك و لوولەی چەكەكە لەو كەسەوه‌ نزیك بووە".

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure