رێورەسمێن جەژنا خدر ئلیاس

هەواڵ / که‌لتور :: 11/02/2019‌ :: 146‌ جار بینراوە

دواڕۆژ، رەڤەند گوھەرزی

ئەڤرۆ دوو شەمبی ١١-ی شۆباتا ٢٠١٩-ێ رێورەسمێن جەژنا خدر ئلیاس یا ئێزدیان دەستپێکرن، شارەزایەکێ کاروبارێن ئێزدیان و ئەندامێ بنگەھێ لالش یێ رەوشەنبیری و کومەڵایەتی دبێژیت" ئەڤ جەژنە یا گرێدای وەرزێ چاندنێ و سرۆشتیە و ئەو کەسێن ناڤێن وان خدر یان ئلیاس دناف ئێزدیاندا دێ سێ رۆژیان گرن ".


شەمۆ قاسم، شارەزایێ کاروبارێن ئێزدیان و ئەندامێ بنگەھێ لالش یێ رەوشەنبیری و کومەڵایەتی بۆ دواڕۆژ راگەھاند:" ئەڤرۆ رێورەسمێن جەژنا خدر ئلیاس دەستپێکرن کو ل رۆژێن دوو شەم و سێشەم وچوار شەم ئەو کەسێن ناڤێن وان خدر یان ئلیاس دناف ئێزدیاندا دێ سێ رۆژیان گرن و ھەر کەسەکێ دی بڤێت دێ رۆژیان دگریت".

گۆتژی:" بەری جەژن بھێتە کرن ئێزدی چەندین رێورەسمێن تایبەت ب جەژنا خدر ئلیاس ڤە دگێرن پشتی سێ رۆژا ل رۆژا پێنچ شەمبی جەژن دەستپێدکەت".

شەمۆ دیارکر ژی:" جەژنا خدر ئلیاس زێدەتر یا گرێدای وەرزێ چاندنێ و سرۆشتیە و رێورەسمێن ڤێ جەژنێ ژی ل رۆژا دووشەمبی دەستپێدکەن ھەر مالەکا ئێزدی ھندەک دەخل و دانی دقەلینیت کو ئێزدی دبێژنێ قەلاتک".

دازانین ژی "ئێزدی وان قەلاتکان دبەنە ئاشی و دھێرن و دکەنە پێخوون و ئێڤاریا رۆژا جەژنێ ئانکو ل رۆژا چارشەمبی ھەر مالەکا ئێزدی ھندەک پێخوونێ دکەنە د سینیکەکێ دا و ل سەرێ خانیێ مالێ د دانن ب وێ ھیڤیێ خدر ئلیاس نیشانەکێ لسەر بکەت و ببیتە ھێمایێ بەرەکەتی د وێ مالێ دا".

قاسم خویاکر کو، ئێزدی چەرخووسێ چێدکەن ئەو ژی ب ساڤارێن ھێرای و قەلاندی دروست دکەن بۆ خوارنا جەژنێ ھەمی جوتیار ژی پێخوونێ دبەن ل ناڤ زەڤیێن خوە بەلاڤ دکەن داکو خێر و بەرەکەت بکەڤیتە دناڤ زەڤیێن وان یێن چاندنێ دا .

ل گور گۆتنا شەمۆ قاسم "ئێزدی وەکو بیر و باوەر ل رۆژێن رۆژیا وجەژنێ نێچیرێ قەدەغە دکەن و سەربر ژی ناھێنە سەرژێکرن و دڤان رۆژاندا ب رێ و ریبارێن دوور ناچن دبیر و باوەریا ئێزدیان دا گونەھە ئەڤە بھێنە کرنو جەژنا خدر ئلیاس ئێکە ژ جەژنێن کەڤنار یێن ئێزدیان".

ئێزدیان ھەشت جەژن ھەنە و (خدر ئلیاس) ئێکە ژکەفنترین جەژنێن وان کو زێدەتر یا گرێدای وەرزێ چاندنێ و سرۆشتیە و ھەر مالەکا ئێزدی ھندەک دەخل و دانی دقەلینیت و دبێژنێ قەلاتک.

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure