پۆلیسی سلێمانی دەستگیركردنی باندێكی ماددەی هۆشبەری راگەیاند

هەواڵ / کوردستان :: 11/02/2019‌ :: 308‌ جار بینراوە

دواڕۆژ، پشتیوان جەمال

پۆلیسی سلێمانی رایدەگەیەنێت: لە ماوەی 10 رۆژی رابردوودا چەند تۆمەتبارێكیان وەكو باندی ماددەی هۆشبەر دەستگیركردووە. 


نەقیب سەركەوت ئەحمەد، وتەبێژی پۆلیسی سلێمانی (ئەمڕۆ 11ی شوباتی 2019) لە كۆنگرەیەكی رۆژنامەوانیدا رایگەیاند: رۆژی 9ی شوبات باندێك كە سەرقاڵی كڕین و فرۆشتنی ماددەی هۆشبەر بوون لەجۆری كریستاڵ دەستگیركراون، سەرەتای ئەم ئاشكرابوونەش لەدیارنەمانی ئافرەتێك دەستیپێكردووە كە لەبنكەی پۆلیسی سەرچنار سكاڵای لەسەر دیارنەمانەکەی تۆماركراوە، دواتر بنكەكانی پۆلیسی سەرچنار و پیرەمەگرون و نەهێشتنی تاوان توانیان بگەنە ئەو سەرەداوەی ئەو ئافرەتە لەباخێكی سنووری ناحیەی پیرەمەگرون دەستبەسەر كراوە.

ناوبراو روونیكردەوە: هێزێكی پۆلیس بەبڕیاری دادوەر كە فەرمانی دەستگیركردن بۆ كەسەكان دەرچووبوو، توانیان  بڕۆنە باخەكەوە و 5 كەس دەستگیركران كە  لەنێویاندا ئافرەتەكەی بووە، دەستیشگیراوە بەسەر نیو كیلۆ ماددەی تلیاك و كریستاڵ.

وتەبێژی پۆلیسی سلێمانی ئاماژەی بەوەكرد: خاوەنی باخەكەش كە تۆمەتباری سەرەكییە و دوای ئەوەی لە باخەكە دەستگیر نەكرا، لەشوێنێكی دیكە دەستگیركراوە، لەئۆتۆمبیلەكەشیدا دەستبەسەر چەند پارچەیەك كریستاڵ و چەند پێداویستییەكی دیكەدا گیراوە.

سەركەوت ئەحمەد جەختیكردەوە: هەفتەی رابردووش تۆمەتبارێكی دیكەیان دەستگیركردووە كە بەهەمان شێوە بڕێك ماددەی كریستاڵی پێبووە لەگەڵ چەند پێداویستییەکی دیكە.

بەوتەی ناوبراو، لەدەرچوونی شەوانەی هێزەكانیان بۆ نەهێشتنی تەقە و شەڕكردن، چەند تۆمەتبارێك بەتۆمەتی تەقەكردن و دروستكردنی پشێوی دەستگیركراون، لەگەڵ دەستگیركردنی پێنج تۆمەتبار بەدزی.

وەكو وتەبێژی پۆلیسی سلێمانی باسیكرد: مێرمنداڵێكیش كە بەئەنقەست شوشەی زیاتر لە 30 ئۆتۆمبیلی شكاندوە و شوختی تێكردوون دەستگیركراوە.

 

پ:ئەڤین



created by Avesta Group and powered by Microsoft Azure