گومەتی شین.. چیرۆكە شاراوەكەی قەڵای كەركوك

هەواڵ / ڕاپۆرت :: 6 رۆژ پێش ئێستا‌ :: 164‌ جار بینراوە
گومەتی شین

تاگ :: ڕاپۆرت

دواڕۆژ، عیماد جەباری

بۆ نزاكردن و پاڕانەوە گەنجێكی زۆر هانا بۆ قەڵای كەركوك دەهێنن تاوەكو لەسەر گۆڕەكەی (بوغدا خاتوون) بپارێنەوە بەو هیوایەی نزاكانیان لەبارەی كێشەی سۆزداریەوە گیرابن.

 
لەژێر گومەتە شینەكەی قەڵادا كە تەرمی كچە بازرگان یاخود پاشایەكی دێرینی تێدا نێژراوە، گەلێك عاشق بەدەم گریانەوە چیرۆكەكانی خۆیان گێڕاوەتەوە بۆ ئەوەی لانیكەم وەكو دەردەدڵێك بیڕێژن.

نەبیل موعتەسەم، گەنجێكی تەمەن 21 ساڵ وەكو خۆی دەڵێت لە هاوڕێكانيەوە بۆی باسكراوە كە گومەتەكەی سەر قەڵا گەلێك چیرۆكی عاشقانەی بەچارەسەرگەیاندوە، ئەو بۆ دواڕۆژ ئاماژەی بۆ ئەوەكرد كە كێشەكەی گەیشتوەتە بنبەست لەگەڵ خانەوادەی كچە خۆشەویستەكەیدا بۆیە ناچار هاتوەتەسەر گومەتەكە بۆ ئەوەی ببێتە هۆكارێك بۆ نەرمبونی دڵی كەسوكاری ئەو كچەی خۆشیدەوێت.

نەبیل لەبارەی چیرۆكی عاشقبونەكەیەوە دەڵێت: "چەند ساڵێكە لەگەڵ كچێكدا خۆشەویستی دەكەم، بەڵام لەمدواییەدا بەهۆی كێشە و نەسازانیانەوە باوك و دایكی كچە خۆشەویستەكەم لەیەكتر جیابونەتەوە، ئەمەیش لەئێستادا كێشەی لە بەردەمم دروستكردوە و باوكی چوەتە رقا لەهاوسەرەكەی پێشوی كە كچەكەی لایە و رازینابێت من مارەی بكەم".

ئەو گەنجە ئەوەشدەڵێت: "گەلێك رێگەم تاقیكردوەتەوە و ئامادەشم هەموو رێگەیەك بگرمەبەر بۆ گەیشتن بە خۆشەویستەكەم، هەندێ لە هاوڕێكانیشم رایانسپاردم بۆ ئەوەی هانا بەرمەبەر گومەتە شینەكە بەوتەی ئەوانیش دەردی زۆر دەردەداری چارەسەركردوە".

گومەتی شین، كەوتوەتە ناوەندی قەڵای دێرینی كەركوك بەشێوەیەك جوان دروستكراوە كە لەیەكەم نیگاوە سەرنج رادەكێشێت.

دیوارەكانی گومەتەكە بەشێوەیەكی ئەندازیاری و رەنگاورەنگ دروستكراوە، بەپێی سەرچاوە مێژوییەكان بەزمانی توركی لەیەككاتدا پێیوتراوە گومەتی شین و هەندێ جاریش وتراوە گومەتی سەوز.

پانی گوتەكە پێنج مەترە و بەرزێكەیشی دە مەترە، هەرچی دیوارەكانی دەورویشێتی شەش مەتر بەرزە، لەدوو نهۆمیش پێكهاتوە و ژێر زەمینەكەشی سێ تاق (پەنجەرە)ی لەخۆگرتووە بۆ روناكی.

شەیدا بەكر، جێگری بەڕێوەبەری فەرمانگەی شوێنەواری كەركوك بە دواڕۆژی راگەیاند: كچی پاشایەكی لە ئاسیای ناوەڕاستەوە بەتایبەتتریش لە بوخارەوە لەگەڵ كەسوكارەكەیدا هاتووە بۆ حەجكردن، لەرێگادا نەخۆش كەوتووە كاتێك نزیك كەركوك بونەتەوە كۆچی دواییكردوە، باوكیشی هەر لە شارەكە ناشتوێتی كە ئەوكات شار لەسەر قەڵا بووە و گومەتێكی بەدەستوری خۆشیان بۆ دروستكردووە كە ئێستا پێیدەوترێت گومەتی شین.

وتیشی: "مێژوی دروستكردنی گومەتەكە بۆ 762ی كۆچی دەگەڕێتەوە كە بەرانبەر ساڵی 1361ی زاینییە".

ئەوەشی خستەڕو كە لەكاتی خۆیدا بەشێوەی هەڕەم دروستكراوە، بەڵام دواتر لەلایەن ئەندازیارێكی مەسیحیەوە شێوازەكەی بەشێوەیەكی بیناسازی دروستكردوەتەوە وەكو ئەوەی ئێستا كە هەیە.

سەرچاوە مێژویيەكان باس لەوەدەكەن كە لەدوای گیانلەدەستدانی بوغدا خاتوون، بەهۆی دوری كەركوك لەزێدی خۆیان كە خەڵكی ئاسیای ناوەڕاست بونە بڕیاریاندا هەر لەو زەویەدا بینێژن كە تێیدا گیانیلەدەستداوە كە قەڵا دەكات و بەدەستوری خۆیشیان شوێنەوارێكی جوان و سەرنجراكێشیان بۆ بونیادناوە بەشێوەیەك تا هەنوكەیش یەكێكە لەو شوێنەوارانەی سیمایەكی جوانی بەقەڵا بەخشیووە.

لە مێژووی خۆیشیدا چەند جارێك لە سەردەمە جیاوازەكاندا گومەتی شین لەلایەن خەڵكەوە روبەڕووی تاڵانكردن بوەتەوە، چونكە وازانراوە هاوشێوەی گۆڕە دێرینەكان خشڵ و زێڕێكی زۆری تێدایە.

فەهمی قاسم، سەرۆكی رابیتەی قەڵای كەركوك بە دواڕۆژی وت: لە سەردەمی سەلجوقیەكان ئەو شوێنەوارە دروستكراوە سەرەتا لە شێوەی بازنەییەك بووە هاوشێوەی شوێنەوارە دێرینەكانی پاكستان و ئۆزپاكستان، باوكێك لە پای خۆشەویستی بۆ كچەكەی ئەو گومەتەی بۆ دروستكردوە دوای ئەوەی كۆچی دواییكردوە.

وتیشی: "كچەكە ناوی بوغدا خاتوون بوە، مانای ناوەكەشی بەواتای گەنم دێت، كە بەهۆی نەخۆشییەوە گیانی لەدەستداوە".



  • ڕۆژ
  • هەفتە
  • مانگ
created by Avesta Group and powered by Microsoft Azure