لەبەر بەرژەوەندی کەسانی خاوەن پێداویستی تایبەت چەند مەرجێک بۆ خاوەن پرۆژەکان دیاریدەکرێت

هەواڵ / کوردستان :: 03/02/2019‌ :: 253‌ جار بینراوە

تاگ :: كوردستانى

دواڕۆژ، پشتیوان جەمال
بەڕێوەبەرایەتی گشتی چاودێری كۆمەڵایەتی سلێمانی بۆ كارئاسانی خاوەن پێداویستی تایبەت، چەند مەرجێكی بۆ ئەو پڕۆژانە داناوە كە جێبەجێدەكرێن و ئەگەر شوێنەكان پابەند نەبن پێوەی، بە زیاتر لە 15 ملیۆن دینار سزادەدرێن.

عومەر گوڵپی، بەڕێوەبەری گشتی چاودێری كۆمەڵایەتی سلێمانی بەدواڕۆژی راگەیاند: ئەو پڕۆژانەی دروستدەكرێن چ حكومی یان بازرگانی بن لەهەر بوارێكدا كە مۆڵەت وەردەگرن، دەبێت رەچاوی لایەنی ئەندازیاری بۆ خاوەن پێداویستی تایبەت بكەن، بۆ نمونە زەوییەكە بە ماددەیەک رووپۆش نەکەن کە خلیسکاندن دروستبکات و خاوەن پێداویستی تایبەت بەدارشەقاكانیان بكەون.

ناوبراو روونیكردەوە: دەرگاكان ئەوەندە فراوان بن لەكاتی چوونە ژوورەوە خاوەن پێداویستییەكی تایبەت بەئاسانی بڕواتە ژوورەوە، هەروەها ئەگەر باڵەخانەكە نهۆمی دووەم یان زیاتری هەبوو باڵەخانەكە مەسعەدی هەبێت یان قادرمەكانی بەشێوەیەك بێت خاوەن پێداویستی تایبەت بەئاسانی پێیدا سەربكەوێت.

گوڵپی جەختیكردەوە، دەبێت سەرجەم دامەزراوەكان پابەندی ئەو مەرجانە بن، ئەگەرنا ئەندازیارانیان چاودێری پڕۆژەكان دەكەن و هەر شوێنێك پابەند نەبێت بەپێی یاسای خاوەن پێداویستی تایبەت ئەوان سكاڵای لەسەر تۆمار دەكەن تا دادگا رێكاریی پێویست بگرێتەبەر كە سزاكەشی لە 15  ملیۆن دینار كەمتر نییە.



created by Avesta Group and powered by Microsoft Azure