سلێمانی: چەند كەسێك بێ بەرامبەر گۆڕ هەڵدەكەنن

هەواڵ / کوردستانی :: 03/02/2019‌ :: 403‌ جار بینراوە

تاگ :: سلێمانی

دواڕۆژ، پشتیوان جەمال
لەناحیەی بەكرەجۆی نزیك شاری سلێمانی كە ئێستا وەكو گەڕەكێكی شارەكەیە، ساڵانێكی زۆرە چەند كەسێك خۆبەخشانە گۆڕ بۆ مردووان هەڵدەكەنن، شارەوانیش ستایشی كارەكەیان دەكات.


حەمەڕەشید مستەفا، خانەنشینێكی تەمەن 68 ساڵە، بەدواڕۆژی راگەیاند: ئەوان لەساڵانی هەشتاكانەوە بەشێوەی خۆبەخشانە گۆڕ بۆ مردووەكان هەڵدەكەنن، پێشتر بە پاچ هەڵیانكەندووە، بەڵام لەو كاتەوەی حەفارە هاتووە، گۆڕەكە هەڵدەكەنێت و ئەوانیش ئامادەكارییەكانی دیكە دەكەن.

حەمەڕەشید دەڵێت: "لەبەر خاتری خودا و مرۆڤایەتی ئەو كارە دەكەین و هیچ بڕە پارەیەكیش لەخاوەن مردووەكە وەرناگرین، تەنانەت خەڵكیش هەبووە پارەی پێداوین، بەڵام رەتمان كردۆتەوە".

عەبدولكەریم محەمەد، ئەندامی ئەنجومەنی شارەوانی بەكرەجۆ دەستخۆشی لە كاری خۆبەخشانەی ئەو هاووڵاتییانە كرد و بۆ دواڕۆژی روونكردەوە: لەناحیەكەی ئەوان تا ساڵی 2005یش خەڵك خواردنی نیوەڕۆی پرسەی بۆ خاوەن پرسەكە ئامادە كردوە، گۆڕهەڵكەندنیش بەهاوكاری بووە، بۆیە ئێستاش كاری ئەو گۆڕهەڵكەنە خۆبەخشانە زۆر باشە و هیوادارن ئەو كارە لەكوردستان ببێتە نەریت.

خەبات ناجی، بەرپرسی بەشی گۆڕستانەكان لەشارەوانی سلێمانی بەدواڕۆژی راگەیاند: بە رەسمی هەڵكەندنی گۆڕی گەورە بە 150 هەزار و بچووكیش بە 75 هەزار دینارە، كاری ئەو هاووڵاتییانەش زۆر باشە، تەنانەت لەزۆربەی ناوچەكانی دەرەوەی شاری سلێمانی خەڵك بەخۆبەخشانە گۆڕ هەڵدەكەنن.

پێداچوونەوە: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure