نه‌خۆشخانه‌ى فریاكه‌وتنى هه‌ولێر: هیچ حاڵەتێكى مردن بەهۆی زەردوویی تۆمارنه‌كراوه‌

هەواڵ / کوردستان :: 02/02/2019‌ :: 446‌ جار بینراوە

دواڕۆژ
نه‌خۆشخانه‌ى فریاكه‌وتنى رۆژئاواى هه‌ولێر رایده‌گه‌یه‌نێت: له‌مساڵ و ساڵى رابردووش هیچ حاڵەتی مردن بەهۆی زەردوویی تۆمارنه‌كراوه‌.


نه‌خۆشخانه‌كه‌ له‌ رونكردنه‌وه‌یه‌كدا كه‌ (ئه‌مڕۆ شه‌ممه‌ 2ى شوباتى 2019) وێنه‌یه‌كى بۆ دواڕۆژ نێردراوه‌ رایگه‌یاند: بەپێویستی دەزانین هاوڵاتیان و رای گشتی دڵنیابکەینەوە کەوا تەواوی ئەو هەواڵەی بڵاوکراوەتەوە سەبارەت بە نەخۆشی زەردوویی نادروستە و هیچ بنەمایەکی نیە و رەتیدەکەینەوە.

ده‌شڵێت: "نەک لەمساڵدا بەڵکو لەساڵی پاریشدا ٢٠١٨ هیچ حاڵەتی مردن نەبووە بەهۆی زەردوویی (...) دووپاتیدەکەینەوە کە هەواڵی مردنی نەخۆش بەهۆی نەخۆشی زەردوویی هیچ ئەسل و ئەساسی نیە".

له‌كاتێكى پێشترى ئه‌مڕۆدا دكتۆر بینیامین جه‌میل، سه‌رۆكی به‌ش له‌ نه‌خۆشخانه‌ی فریاكه‌وتنی رۆژئاوای هه‌ولێر به دواڕۆژی راگه‌یاند: "ئێمه‌ به‌گشتی ئامارێكی وردی تووشبوانمان له‌ نه‌خۆشخانه‌ نییه‌، به‌ڵام چه‌ند حاڵه‌تێكی مردن له‌ 2019 تۆماركراوه‌ و سێ هاوڵاتی گیانیان له‌ده‌ستداوه‌" كه‌ وەک خۆی دەڵێت: تەنها ئاگاداری ئەو سێ حاڵەتەیە.

دەقی روونكردنەوەكە:

هاوڵاتیان دڵنیادەکەینەوە هیچ کەسێك لە هەولێر بەهۆی پەتایەکەوە گیانی لەدەستنەداوە

روونکردنەوەیەک لە نەخۆشخانەی فریاکەوتنی رۆژئاوای هەولێر سەبارەت بە هەواڵێکی نادروست لەچەند پەیج و وێبسایتێک لە تۆڕە کۆمەڵایەتیەکان بڵاوبۆتەوە.

بە پێویستی دەزانین هاوڵاتیان و ڕای گشتی دڵنیابکەینەوە کەوا تەواوی ئەو هەواڵەی بڵاوکراوەتەوە سەبارەت بە نەخۆشی زەردوویی نادروستە و هیچ بنەمایەکی نیە و ڕەتی دەکەینەوە چونکە هیچ کەسێک بەو ناوە سەرۆکی بەش نیە لە نەخۆشخانەکەمان وە بەڕێز د.هۆشەنگ سدیق وەکو سەرۆکی بەش و بەناوی بەڕێوەبەرایەتی نەخۆشخانە ڕایدەگەیەنین کەوا هیچ حاڵەتی لەو جۆرە نەبووە تەنانەت نەخۆشخانەی فریاکەوتنی ڕۆژئاوا تایبەتە بە فریاکەوتن و نەشتەرگەریەکان نەوەک نەخۆشی زەردوویی بەڵکو ئەم نەخۆشیە پرۆگرام و بەرنامەی تابیەتی خۆی هەیە لە بەڕێوەبەرایەتی پاراستنی تەندروستی هەولێر، بەهەمان شێوە ئەم بەڕێوەبەرایەتیە ئەم زانیاریانە ڕەتدەکاتەوە، نەک لەم ساڵدا بەڵکو لەساڵی پاریشدا ٢٠١٨ هیچ حالەتی مردن نەبووە بەهۆی زەردوویی، بۆ ئەم مەبەستە لێکۆلینەوە و ڕێکاری یاسایی دەگرینە بەر بەرامبەر ئەو کەسانەی بەبێ هیچ بنەمایەک لێدوان و زانیاری نادروست بڵاودەکەنەوە کە دەبێتە هۆکاری دڵەڕاوکێ و ترس لە نێو هاوڵاتیان، جارێکی تر دووپاتی دەکەینەوە کە هەواڵی مردنی نەخۆش بەهۆی نەخۆشی زەردوویی هیچ ئەسل و ئەساسی نیە و هیچ کەسێکیش بەم ناوە سەرۆکی بەش نیە لەنەخۆشخانەکەمان.

بەڕێوەبەرایەتی نەخۆشخانەی فریاکەوتنی رۆژئاوای هەولێر
٢ی شوباتی ٢٠١٩



  • ڕۆژ
  • هەفتە
  • مانگ
created by Avesta Group and powered by Microsoft Azure