پردێک لافاو بردی و مەترسی لەسەر دەیان ماڵ دروستبووە

هەواڵ / کوردستان :: 28/01/2019‌ :: 5144‌ جار بینراوە

دواڕۆژ، عەلی حەمەسەعید
بەهۆی بەردەوامی بارانبارین و بەرزبوونەوەی ئاستی ئاوی چەمی چەقان و کەنی زەرد، لە ژمارەیەک گەڕەکی قەزای سەیدسادق لافاو دروستبووە و پردێک لافاو بردویەتی وتیمەکانی بەرگری شارستانیش لە ئامادەباشیدان بۆ بەدەمەوەچوونی هاووڵاتیان.


دیاری رەفیق، قایمقامی قەزای سەیدسادق بەدواڕۆژی راگەیاند: بەهۆی بەردەوامی بارانبارینی ئەمڕۆوە ئاستی ئاوی چەمی چەقان زۆر بەرزبووەتەوە و تاڕادەیەک مەترسی لەسەر دەیان ماڵی نزیک ئەوچەمە دروستبووە، بەڵام تیمەکانمان لە ئامادەباشیدان بۆ بەدەمەوەچوونی هاووڵاتیان لە هەرحاڵەتێکی نەخوازراودا.

وتیشی: "بەهەمان شێوە ئاستی ئاوی کەنی زەردیش بەرزبووەتەوە و بووەتەهۆی دروستبوونی لافاو لە هەندێک لە گەڕەکەکانی قەزای سەیدسادق، هاوکات پردێکیش کە هاتوچۆی هاوڵاتیانی بەسەرەوەبووە لافاو بردویەتی، بەڵام خۆشبەختانە تائێستا هیچ زیانێکی گیانی تۆمارنەکراوە".

قایمقامی قەزای سەیدسادق ئەوەشی خستەڕوو: لە ئێستادا تیمەکانمان لە ناوبازاڕ و گەڕەکەکانی قەزاکە سەرقاڵی بەردانی مەنهۆڵەکان و بەدەمەوەچوونی هاووڵاتیانن، بۆیە داوا لە هاووڵاتیان دەکەین لە حاڵەتی روودانی هەر ئەگەرێکی نەخوازراودا پەیوەندی بە تیمەکانمانەوە بکەن.

پ: ن.ر



created by Avesta Group and powered by Microsoft Azure

بەپەلە