هەڵوێستی بزووتنەوەی ئیسلامی لەبارەی دروستبوونی (هێڵی گۆڕانكاری) لەحیزبەكەیان

هەواڵ / کوردستان :: 26/01/2019‌ :: 272‌ جار بینراوە

دواڕۆژ، پشتیوان جەمال
وتەبێژی بزووتنەوەی ئیسلامی كوردستان رایدەگەیەنێت: راگەیەندراوی (هێڵی گۆڕانكاری) لەحیزبەكەیان بەفەرمی نابینن، ئامادەیی خۆیشیان بۆ گفتوگۆ لەگەڵیان دووپاتدەكەنەوە. 


د.عەبدوڵا وەرتی، وتەبێژ و كارگێڕی مەكتەبی سیاسی بزووتنەوەی ئیسلامی بەدواڕۆژی راگەیاند: ئێمەش لەمیدیاكانەوە ئەو راگەیەندراوەمان بینیوە، بەڵام لەبەرئەوەی ناوی هیچ كەسێكی لەسەر نییە، بۆیە بە فەرمی نایبینن.

وتیشی: "زۆر هەوڵماندا ئەو برایانە بگەڕێنەوە، بەڵام دیارە هەوڵەكان سەركەوتوو نەبوون، ئەوان وتیان هیچ پەیوەندیمان بە بزووتنەوەوە نەماوە، بەڵام ئێستاش برای ئێمەن و ئازادن چی دەكەن و چۆن بڕیاردەدەن".

سەبارەت بەوەی ئامادەن گفتوگۆیان لەگەڵ بكەنەوە، وەرتی وتی: "هەر كادرێك ئامانجی خزمەتكردن و پاراستنی نێوماڵی بزووتنەوە بێت ئامادەین گفتوگۆیان لەگەڵدا  بكەین، بۆ ئەوەی بزووتنەوە هەنگاوێكی دیكە ببەینە پێشەوە، ئەگەر لەگەڵ خەڵكی دیكە گفتوگۆ بكەین چۆن لەگەڵ ئەوان نایكەین؟، هەرچەندە ئەوان دەستیانلەكاركێشاوەتەوە، بەڵام بزووتنەوە هەمیشە ماڵە گەورەكەی ئیسلامخوازانە". 

شەوی هەینی رابردوو ژمارەیەك سەركردە و كادری بزووتنەوەی ئیسلامی (هێڵی گۆڕانكاری)یان لەنێو حیزبەكەیاندا راگەیاند و ئامانجیان "كۆكەرەوەی هەموو ئەو كادر و سەركردە دڵسۆزانەی ناو بزووتنەوە و ئەوانەی دەرەوەی بزووتنەوەیە كە لەماوەی ئەم چەند ساڵەدا ناچاركراون بەدووركەوتنەوە یان پەراوێزخراون".

لە راگەیەندراوێكی هێڵی گۆڕانكاری-ئەنجومەنی بەڕێوەبردن ئەوە خراوەتەڕوو: لە چەند رۆژی رابردوودا هەندێك لە تۆڕە كۆمەڵایەتییەكان و ناوەندەكانی راگەیاندن دەنگۆی دامەزراندنی حیزبێكی نوێی ئیسلامی لەلایەن كۆمەڵێك سەركردە و كادری باڵای حیزبە ئیسلامییەكانەوە بڵاوبووەوە، بەتایبەتی ئەم دەنگۆیە دوای ئەوە هات كە شەش سەركردەی بزووتنەوەی ئیسلامی دەستلەكاركێشانەوەی خۆیان راگەیاند.

باس لەوەش دەکەن: ئێمە وەك كۆمەڵێك ئەندامی مەكتەبی سیاسی و سەركردایەتی و كادری باڵای بزووتنەوەی ئیسلامی كە لە ئێستادا خۆمان لەو دۆخە گەندەڵ و گوماناوییەی ناو بزووتنەوە و شێوازی بەڕێوەبردنەكەی دابڕیوە، نامانەوێت هیچ ژمارەیەكی تر لەحیزبی ئیسلامی زیاد بكەین و كار و خەباتمان بۆ رێكخستنەوەی ناوماڵی ئیسلامییەكانە، نەك زیاتر پەرتەوازەكردنی".

وەكو لە راگەیەندراوەكە ئاماژەی بۆ كراوە: لەم پێناوەشدا كار بۆ گێڕانەوەی بزووتنەوەی ئیسلامی دەكەین بۆ سەر هێڵە راست و دروست و شەرعییەكەی سەرەتای دروستبوونی كە زانا و پێشەوای گەورە مامۆستا مەلا عوسمان رابەرایەتی كرد.

ئەو سەركردە و كادرانەی بزووتنەوە دەڵێن: "دەمانەوێت ئەو حیزبە نوێیەی میدیاكان باسی دەكەن خودی بزووتنەوەی ئیسلامی بێت سەرلەنوێ دایمەزرێنینەوە و بیگێڕینەوە بۆ سەر رەوتە شەرعییەی سەرەتا، بۆ ئەم مەبەستەش لەچوارچێوەی پڕۆژەیەكی بابەتی و نوێدا (هێڵی گۆڕانكاری) لەناو بزووتنەوەی ئیسلامیدا رادەگەیەنین كە كۆكەرەوەی هەموو ئەو كادر و سەركردە دڵسۆزانەی ناو بزووتنەوە و ئەوانەی دەرەوەی بزووتنەوەیە كە لەماوەی ئەم چەند ساڵەدا ناچاركراون بەدووركەوتنەوە یان پەراوێزخراون".

پ: ن.ر



created by Avesta Group and powered by Microsoft Azure