یانەی پارێزەرانی ژینگە هەڵمەتی هۆشیاركردنەوەی ژینگەییان ئەنجامدا

هەواڵ / کوردستان :: 24/01/2019‌ :: 79‌ جار بینراوە

تاگ :: سلێمانی

دواڕۆژ، پشتیوان جەمال
یانەی پارێزەرانی ژینگە لە سلێمانی، هەڵمەتێكی هۆشیاركردنەوەی ژینگەییان ئەنجامدا و داوا لە خەڵكی دەکەن ماددەی پلاستیكی بەكارنەهێنن، چونكە بۆ ژینگە خراپە.


ئێوارەی ئەمڕۆ پێنجشەممە، یانەی پارێزەرانی ژینگە كە لەچەند خوێندكارێكی زانكۆی ئەمەریكی-سلێمانی پێكهاتووە، هەڵمەتێكیان لەژێر ناوی (بازاڕكردنەكەت باشتر بكە) لە بازاڕی ماجید مۆڵ لەشاری سلێمانی بۆ ماوەی 3 كاتژمێر ئەنجامدا.

هەوراز حسێن، یەكێك لەو خوێندكارانە بەدواڕۆژی راگەیاند: لەساڵی 2016ەوە دامەزراوین و ئامانجیشیان هۆشیاركردنەوەی هاووڵاتیانە بۆ پاراستنی ژینگە، هەر كەسێك دێتە ئەم بازاڕە ئاگاداریان دەكەینەوە لەو پێداویستییانەی دەیكڕن زیانی بۆ ژینگە نەبێت، مەرجیش نییە ئەو كەسانە بەقسەمان بكەن، بەڵام گرنگە ئاگاداریان بكەینەوە.

روونیشیكردەوە: ماددەی پلاستیكی زیانی سەرەكی بۆ ژینگە هەیە و داوایان لێدەكەین ئەو پێداویستییانەی ئەو ماددەیەی تێدایە نەیكڕن، بۆ نموونە عەلاگەی رەش ماددەی پلاستێكی تێدایە بەكارینەهێنن و لەبری ئەوەش توركە بەكاربێنن، چونكە بۆ ژینگە باشترە.

شنۆ عەبدوڵا، كچێكی تەمەن 22 ساڵە و بەمەبەستی بازاڕكردن رووی لەو بازاڕە كردبوو، سەردانی تیمی یانەكەی كرد و بۆ دواڕۆژی روونكردەوە: هەڵمەتی هۆشیاركردنەوەی لەم جۆرە كارێكی باشە و هەوڵ دەدەین سوود لەڕێنماییەكانیان وەربگرین لەو پێداویستییانەی دەیكڕن بۆ ئەوەی بەهەموو لایەك ژینگە بپارێزین.

پ: ن.ر



  • ڕۆژ
  • هەفتە
  • مانگ
created by Avesta Group and powered by Microsoft Azure