دواجار دادگا لەسەر كەیسەكەی مریەم هەڵەبجەیی بڕیاریدا

هەواڵ / کوردستان :: 20/01/2019‌ :: 15364‌ جار بینراوە

دواڕۆژ، عەلی حەمە سەعید و عیسا عەبدولقەهار
پاش چاوەڕوانییەكی زۆر، بە بڕیاری دادگای هەولێر، ئەمڕۆ 20ی کانونی دووەمی 2019 (مریەم باروتجییان) یەكێك لە منداڵە دۆزراوەكانی هەڵەبجە ناوەكەی گۆڕدرا بۆ (ژیان كامەران) ئەوەش دوای ئەوەی لە ساڵی ڕابردوودا بە هاوناز ئەحمەد ناسرابوو.

ئەیاد كاكەیی، پارێزەری دۆسیەی مریەم باروتجیان بە دواڕۆژی ڕاگەیاند: دوای چەندین دانیشتن لەسەر یەكلاكردنەوەی چارەنوسی مریەم باروتجییان ئەمڕۆ دادگا بڕیاری كۆتایی لەبارەی ناوبراوەوە دەركرد.

بەوتەی كاكەیی، لە بڕیارەكەی دادگادا، هاتووە: ئەمڕۆ لە 20/1/2019وە مریەم باروتجیان ناوی گۆڕدراوە بۆ (ژیان كامەران لهۆن) ناوی دایكی (كوردستان دارا پێشڕەو)ە لەدایكبووی (21/9/1987) شوێنی لەدایكبوون، پارێزگای هەڵەبجە.

 

هەر لە بڕیارەكەی دادگادا ئەوەش هاتبوو كە (ژیان كامەران) كچە و هاوسەرگیری ئەنجامنەداوە، هاوكات لە ئەمڕۆوە دەتوانێت لە هەموو دامودەزگا رەسمییەكاندا بەو ناوەوە مامەڵە رەسمییەكانی بكات.

 

مریەم باروتجییان لە ساڵی 2015 گەڕایەوە بۆ شاری هەڵەبجە دوای چاوەروانییەكی زۆر دواتر لە پشكنینی DNA وترا كە (مریەم یەكێكە لە منداڵە ونبووەكانی هەڵەبجە و ناوی هاوناز ئەحمەد)ە بەڵام دوای ساڵێك گومانەكان لەسەر ئەنجامی ئەو پشكنینە دروستبوون و تا دواجار ئەو دایكەی كە مریەمی پێدرابوو، ڕایگەیاند: مریەم كچی ئەو نییە.

 

دواتر مریەم باروتجیان بە هاوكاری پارێزەرانی خۆبەخش سكاڵایان لە دادگای هەولێر پاش بەڵێنێكی سەرۆكی حكومەتی هەرێم تۆمار كرد بۆ یەكلاكردنەوەی ناوە ڕاستەقینەكەی و پێدانی ناسنامەی عێراقی، ئەمڕۆش دادگا كۆتا بڕیاری خۆیدا.

پێداچوونەوە: ئارام غەفور



created by Avesta Group and powered by Microsoft Azure