هەڵەبجەییەکان یاداشتێک ئاراستەی کۆمەڵگای نێودەوڵەتی دەکەن

هەواڵ / کوردستان :: 16/01/2019‌ :: 188‌ جار بینراوە

دواڕۆژ، عەلی حەمەسەعید
بەبۆنەی نزیکبوونەوەی یادی31 ساڵەی کیمیابارانی هەڵەبجە، بە ئامادەبوونی بەڕێوەبەرو بەرپرسانی ئیداری پارێزگاکە، لە کۆنگرەیەی ڕوژنامەوانیدا پارێزگاری هەڵەبجە یاداشتێکی ئاراستەی کۆمەڵگای نێودەوڵەتی کرد.


لەکۆنگرە ڕۆژنامەوانییەکەدا ئازاد تۆفیق، پارێزگاری هەڵەبجە ئاماژەی بەوەکرد، جێگەی داخە کە لە کاتی کیمیابارانی هەڵەبجە کۆمەڵگای نێودەوڵەتی بێدەنگییان هەڵبژارد لە بەرامبەر ئەو تاوانەی کە بەرامبەر بە زیاد لە پێنج هەزار هاووڵاتی بێتاوان کرا و بە هەزاران منداڵیش بێسەوشوێن بوون، بەڵام ئێستا کاتی ئەوە هاتووە لە بری ئەو بێدەنگییە ئاوڕ لە هەڵەبجە بدەنەوە.

ئاماژەی بەوەشکرد: ڕووی دەممان لە کۆمەڵگای نێودەوڵەتی دەکەین کە گوێ لە ئاهو نزای کەسوکاری شەهیدان و منداڵە ونبووەکان بگرن و بەخێرایی لایەک لە مێژووی ئەم شارە بکەنەوەو بە مادی و مەعنەوی قەرەبووی خەڵکی ئەم شارە بکەنەوە، بۆ ئەوەی ئێمەی هەڵەبجەیی کەمێک لە ئێش و ئازارەکانمان ساڕێژ ببن.

هەر لەو یاداشتەدا پارێزگاری هەڵەبجە داوایەکی تایبەتی لە هەریەکە لە وڵاتانی ئێران، تورکیا، ئەمەریکا، کۆریای باشوور، یەکێتی ئەوروپا، ئەڵمانیا، فەرەنسا و ئیتالیا کرد کە  لە ڕێگەی ڕێکخراوە مرۆڤ دۆستەکانیانەوە کاری جدی بکەن لە سارێژکردنی برینی کەسوکاری شەهیدان، هاوکات ئەو تاوانەی بەرامبەر بە هەڵەبجە ئەنجامدرا دەخەینە ئەستۆی کۆمەڵگای نێودەوڵەتی، چونکە بێەنگبوون لە ئاست تاوانەکە.

پێداچوونەوە: ئیحسانی مەلا فوئاد



created by Avesta Group and powered by Microsoft Azure