زڤستانێ مه‌ترسی سه‌ر گیانه‌وه‌رێن كووڤی په‌یدا كرییه‌

هەواڵ / کوردستانی :: 12/01/2019‌ :: 229‌ جار بینراوە

دواڕۆژ، بورهان یه‌حیا
به‌رپرسێ رێكخراوا كوردستان بۆ مافێن ئاژه‌لی راگه‌هاند؛ ب هاتنا زڤرستانێ پترییا گیانه‌وه‌رێن كووڤی بۆ بده‌ستڤه‌ئینانا خوارنێ بۆ جهێن نزم دهێن و ئه‌ڤه‌ مه‌ترسییه‌كا مه‌زن ژلایێ نێچیرڤانان بۆ وان گیانه‌وه‌ران په‌یدا دكه‌ت.

د. سلیمان ته‌مه‌ر، به‌رپرسێ رێكخراوا كوردستان بۆ پاراستنا مافێن ئاژه‌لی بۆ دواڕۆژ رۆهنكر "ب هاتنا به‌فره‌كا مه‌زن ل ده‌ڤه‌رێن چیایی كێشه‌یا كێمییا خوارنێ بۆ گیانه‌وه‌رێن كووڤی په‌یدا دبیت و ئه‌ڤه‌ دبیته‌ ئه‌گه‌رێ هندێ ژجهێن بلند بۆ جهێن نزم وجادده‌ و ره‌خودۆرێن گوندان بهێن بۆ هندێ خوارنێ په‌یدا بكه‌ن و ئه‌ڤه‌ باشترین ده‌لیڤه‌یه‌ بۆ نێچیرڤانان كو وان نێچیر بكه‌ن و مه‌ترسیێن مه‌زن سه‌ر گیانێ وان په‌یدا دبیت ونه‌بوونا ره‌وشه‌نبیرییا پاراستنا ژینگه‌هێ ژی زۆر كاریگه‌رییا خۆ هه‌یه‌".

دیاركر: "هاتنا به‌رفرێ بۆ گیانه‌وه‌رێن كووڤی ب مفایه‌ چه‌نكو ب ده‌هان جۆرێن نه‌خۆشیێ ل ناڤ چیای ژناڤ دبه‌ت و هێكێن مار و دووپشك و كرم و گیانه‌وه‌رێن دی یێن زیاندار ژناڤ دبه‌ت و رێكێناده‌ت زێده‌ ببن و دگه‌ل هندێ ئاڤا كانی و رووباران زێده‌ دبیت و هنده‌ك گیانه‌وه‌رێن لاواز ونه‌خۆش دبنه‌ خوارن بۆ گیانه‌وه‌رێن دی".

خویاكر: "سالانه‌ چالاكڤانێن ژینگه‌هێ چه‌ندین ته‌نێن خوارنێ بۆ گیانه‌وه‌رێن كووڤی ب تایبه‌ت بالنده‌رێن وه‌كو كه‌وێ دبه‌نه‌ چیای بۆ هندێ ل وێرێ بخۆن و به‌ره‌ڤ گوندان نه‌هێن داكو تووشی مه‌ترسییا نێچیرڤانان نه‌بن و نوكه‌ ژی مژوولی ڤی كارینه‌".

پ: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure