پۆشینى له‌چك رێگرنه‌بوو له‌به‌رده‌م حه‌زه‌كانى بۆ بوون به‌ سه‌ماكه‌رى بالییه‌

هەواڵ / ڕاپۆرت :: 11/01/2019‌ :: 912‌ جار بینراوە

دواڕۆژ، پشتیوان جەمال
تاكە كچی گروپەكەیە كە لەچكی پۆشیوە و لەنێو ئەندامانی دیكەی گروپەكەدا بەوپەڕی ئازادییەوە سەما دەكات و دەیەوێت پەرەی زیاتریش بە تواناكانی بدات.

ئەسما مەهدی، كچێكی باڵا مامناوەندی لەچكپۆشە و 19 ساڵ لەبەهاری تەمەنی بەڕێكردووە، ئێستاش لەقۆناغی دووی بەشی تەكنیكی كارگێڕییە لە زانكۆی پۆلەتەكنیكی سلێمانی.

ئەسما بە وتەی خۆی لەمنداڵییەوە لەخێزانێك گەورە بووە كە پەیوەستن بە ئایینی ئیسلامەوە، بەڵام وەكخۆی بە دواڕۆژی وت: "باوك و دایكم زۆر پەیوەستن بە ئایینی ئیسلامەوە، بەڵام دواكه‌وتوو نین، كاتێك دین و دواكه‌وتووی یەكدەگرێت زۆر كێشە دروست دەبێت".

ئەو كچە، لەمنداڵییەوە خۆشەویستی بۆ موزیك و دانس هەبووەو بەدوای رێگەیەكدا گەڕاوە، تا تەعبیر لە خۆی بكات، بەڵام تۆڕی كۆمەڵایەتی فەیسبووك بووه‌تە پردێك تا لەڕێگەوە ئاشنایەتی لەگەڵ گروپێك دروست بكات و پەرە بەو توانایەی بدات.

ئەو وتی: "تا منداڵ بووم هەر لەماڵەوە دانسم دەكرد، چونكە نەمدەزانی گروپێكی لەم جۆرە هەیە، ئیتر رۆژێك لە فەیسبووك بەڕێكەوت گروپی (لەیزین)م بینی و پەیوەندیم بە مامۆستاكه‌وە كرد، بەڵام وتم حیجابم، وتی ئاساییە و وەرتدەگرین، پاشان دایكم لەگەڵ مامۆستا رووباریش لە گروپەكە قسەی كرد و خانەوادەكەم رێگرییان نییە سەما بكەم".

ئەسما لەمانگی نیسانی ساڵی رابردووەوە لەگەڵ ئەم گروپە دەستی بە چالاكی كردووەو ئێستاش زۆر مورتاحە، "زۆر مورتاحم و ئەو كەسانەی كاریان لەگەڵ دەكەم كراوە و رۆشنبیرن، كەسوكاریشم هاتوون بۆ نمایشەكانم".

لە یادی 36 ساڵەی دامەزراندنی سەندیكای هونەرمەندانی كوردستان كە لە هۆڵی رۆشنبیری سلێمانی بەڕێوەچوو، گروپی لەیزین بەشداربوون، بەڵام لەنێو گروپەكەدا ئەسما كە تاكە كچی لەچكپۆش بوو توانی سەرنجی هەمووان بەلای خۆیدا رابكێشێت.

ئاوات ئەحمەد گەنجێكی تەمەن 30 ساڵە و یەكێك بوو لە ئامادەبووانی ئەو چالاكییە و بینینی ئەو حاڵەتە سەرنجی راكێشاوە، ئه‌و ده‌ڵێت: "پێم سەیر بوو كچێكی لەچكپۆش سەما بكات، دەستخۆشی لەو كچە و خانەوادەكەی دەكەم كە رێگەیان بەو كچەیان داوە بۆ سەماكردن، چونكە ئەو هونەرە بۆ ئێستای كوردستان قورسە، چجای ئەگەر لەچكپۆشێك سەما بكات".   

گروپی لەیزین ساڵی 1992 دامەزراوە، بەڵام چەندین هەوراز و نشێویان تێپەڕاندووە تا گەیشتوونەتە قۆناغی ئێستایان، د.نیازی لەتیف، سەرۆكی گروپی لەیزین بە دواڕۆژی راگەیاند:"ئەسما تایبەتمەندی خۆی هەیە لە خێزانێكن پەیوەست بە دابونەریتی خۆیانە، بەڵام خێزانەكەی ئازان و خوێندنەوەیەكی وایان هەیە كە دین لە لایەك و ئازادی مرۆڤەكانیش لەلایەكی دیكە".

ناوبراو روونیكردەوە :"كاتێك ئەسما هاتۆتە لایان وتویەتی "دەتوانم بەو شێوەیە بم"، ئەوانیش پێیانباشبووە، "بێگومان ئێمەش دەرگامان كراوەیە، چونكە باس لەجوانییەكانی ژیان و ئاسوودەیی مرۆڤ دەكەین".

د.نیازی وەسفی ئەو كچەی كرد و وتی:"كچێكی زۆر گونجاو و زیرەكە و بەخێرایی فێر بوو، توانایەكی زۆر باشی هەیە و رۆشنبیرە و سەنگینە".

میر كەیوانی تەمەن 15 ساڵ ئەندامێكی گروپی لەیزینە و خۆشحاڵە بەوەی ئەو كچە ئەندامی گروپەكەیانە و دەڵێت:"زۆر ئاساییە ئەسما لەچكپۆشەو كێشەی بۆ دروست نەكردوون".

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure