چارەنووسی یەكێك لە تۆمەتبارانی كوشتنەكەی خاشقچی دیارنییە

هەواڵ / ڕاپۆرت :: 10/01/2019‌ :: 249‌ جار بینراوە

تاگ :: ڕاپۆرت

دواڕۆژ
رۆژنامەی واشنتۆن پۆست-ی ئەمریكی چەندین پرسیاری لەسەر چارەنووسی (سعود ئەلقەحتانی) ورووژاندووە كە دەوترێت سەرپەرشتیاری ئەو تیمەی سعودیە بووە كە تاوانی كوشتنەكەی جەمال خاشقچی رۆژنامەنووسی سعودیەی ئەنجامداوە.

 
رۆژنامەكە ئاماژە بەوە دەكات كە ماوەیەكە سعود ئەلقەحتانی، راوێژكاری پێشووی پاشایەتی سعودیە و كەسی نزیك و جێ‌ متمانەی محەمەد بن سەلمان-ی جێنشین، بێ‌ سەروشوێنە و هیچ هەواڵێكی نییە، تەنانەت لایەنە فەرمییەكانیش باسی ناكەن. ئەمەیش بووەتە هۆی ئەوەی چەندین قسەوباسی جیاواز لەسەر چارەنووسی بكرێت، بەتایبەت كە وەك سەرپەرشتیاری ئەو تیمە ناوی براوە كە تاوانی كوشتنەكەی جەمال خاشقچیی رۆژنامەنووسی لە ناو كونسڵخانەی سعودیە لە شاری ئەستانبوڵی توركیا ئەنجامداوە.

بەگوێرەی زانیاریەكانی واشنتۆن پۆست "كەسێكی خەڵكی شاری جددە وتویەتی: بەم دواییە ئەلقەحتانی-ی لە جددە بینیوە، بەڵام هیچ زانیاریەكی ئەوتۆی لەسەر باس نەكردوە. كەسێكی تریش كە سەر بە حكومەتە وتوویەتی: ماوەیەك لەمەوبەر لە نووسینگەكانی دیوانی پاشایەتی بووە لە ریاز-ی پایتەخت".

رۆژنامەكە لە زاری سەرچاوەیەكەوە كە بە نزیك لە دیوانی پاشایەتی ناوی بردووە، دەڵێت "لەوباوەڕەدام كە سعود ئەلقەحتانی خرابێتە ژێر ئیقامەی جەبرییەوە بەڵام دڵنیایش نیم".

ئەم هەواڵانە لەكاتێكدان كە نزیكەی 50 رۆژێك لەمەوبەر حكومەتی سعودیە رایگەیاندووە "سعود ئەلقەحتانی لەژێر لێكۆڵینەوەدایە"، بێ‌ ئەوەی هیچ زانیارییەك دەربارەی رەوتی لێكۆڵینەكان و لایەنی لێكۆڵیار ئاشكرا بكرێت.

واشنتۆن پۆست لە درێژەی راپۆرتەكەیدا دەڵێت"لە واشنتۆن و پایتەختەكانی ئەورپاوە، بەوردیی چاودێریی چۆنیەتی مامەڵەی حكومەتی ریاز دەكرێت لەگەڵ ئەلقەحتانی دا و وەك تاقیكردنەوەیەكی دادەنێن بۆ زانینی ئەوەی كە ئاخۆ شانشینی سعودیە تاچەند راستگۆ و دڵسۆزە لە بەدادگاییگەیاندنی هەموو ئەو كەسانەی لە كوشتنەكەی خاشقچی گلاون، بە كاربەدەستە گەورەكانیشیەوە".

 

پرسیاری ئەوەیش دەكات"ئاخۆ رۆڵی سعود ئەلقەحتانی لەو تاوانەدا چی و چۆن بووە؟ ئاخۆ بەنهێنی پیلانی كوشتنەكەی داڕشتووە یاخود ئەو فەرمانانەی جێبەجێكردووە كە لە دەسەڵاتدارانی سعودیەوە بۆی چوون و ئاراستەی كراون". بەتایبەت لەكاتێكدا كە "چەندین سەرچاوەی رۆژنامەوانی پەنجەی تۆمەتی رووداوەكە بۆ خودی محەمەد بن سەلمان-ی جێنشین درێژ دەكەن و سعودیەیش رەتیدەكاتەوە".

جەمال خاشقچی رۆژنامەنووسی سعودیە، رۆژی 2ی تشرینی یەكەمی 2018 بۆ هەندێك كاروباری ئاسایی چووە ناو بارەگای كونسڵخانەی وڵاتەكەی لە شاری ئەستانبوڵی توركیا و دوای چەندین رۆژ و چەندین سیناریۆی جیاجیای دەسەڵاتدارانی سعودیە، تەرمەكەی بە پارچەپارچەكراوی دۆزرایەوە.

ئامادەكردن: لوقمان محەمەد رەشید





  • ڕۆژ
  • هەفتە
  • مانگ
created by Avesta Group and powered by Microsoft Azure