بەرەی تورکمانی: دژی ئاڵای کوردستان نین

هەواڵ / کوردستان :: 09/01/2019‌ :: 1027‌ جار بینراوە

دواڕۆژ، عیماد جەباری
بەرپرسێکی بەرەی تورکمانی لەبارەی هەڵکردنی ئاڵای کوردستان لەکەرکوک دەڵێت: "ئێمە دژی ئاڵا نین، بەڵام دەترسین پشێوی لێبکەوێتەوە".

ماردین کوک کایا، ئەندامی فەرمانگەی توێژینەوە سیاسییەکانی بەرەی تورکمانی بەدواڕۆژی وت: "ئێمە دژی ئاڵای کوردستان نین، بەڵام حکومەتی عێراق بە بڕیار هەڵکردنی ئەو ئاڵایەی لەشارەکە قەدەغەکردوە، ئەوەی شەوی رابردوو روویدا لە تەقەکردن و رژانە سەرشەقامەکان مەترسی لا دروستکردوین کە ئارامی شارەکە تێکبدات".

وتیشی: "لەبری وروژاندنی پرسی ئاڵا کە مەترسی دروستبوونی ئاژاوەی لێدەکەوێتەوە، باشتروایە کورد لەگەڵ پێکهاتەکانی دیکە کۆببێتەوە و لەسەر پرسە سیاسییەکان رێکبکەون".

ئاماژه‌ به‌وه‌شده‌كات: دەبوایە یەکێتی ئاڵای لەسەر بارەگاکانی هەڵبکردایە، بەڵام رێگەی نەدایە خەڵک برژێتە سەرشەقامەکان و ئیستیفزاز بە خەڵک بکەن کە هەموو لایەکیان وروژاند.

ئەو بەرپرسەی تورکمان نەیشاردەوە کە دەترسن ئەم هەنگاوەی یەکێتی ئەزموونی ساڵی 2016 دوبارەبکاتەوە کە بە ئاڵای کوردستان ئیستیفزاز بە بارەگاکانی تورکمان کرا و درزی خستە نێو پێکەوەژیانی نێوان پێکهاتەکانیشەوە کە هەرگیز جارێکی دیکە نایانەوێت دوبارەبێتەوە.

شەوی رابردوو 8ی کانونی دووەمی 2019 یەکێتیی نیشتیمانیی کوردستان ئاڵای کوردستانی لەسەر بارەگاکانی لەکەرکوک هەڵکرد، دوای ئەو هەنگاوەش خەڵکێکی زۆر رژانە سەرشەقامەکان بۆ خۆشی ده‌ربڕین.

پێداچوونه‌وه‌: ئیحسانی مه‌لا فوئاد



created by Avesta Group and powered by Microsoft Azure