بەفر دوو ده‌روازەی سنورى داخست

هەواڵ / ئابوری :: 09/01/2019‌ :: 1336‌ جار بینراوە

دواڕۆژ ، محەمەد مستەفا، رەڤەند گوھەرزی
پێشنیوەڕۆی ئەمڕۆ چوارشەممە 9ی کانونی دووەمی 2019، بەهۆی بارینی بەفرێکی زۆرەوە، رێگەی مەرزی کێلێ لە نێوان باشور و رۆژهەڵاتی کوردستان لە سنوری قەزای پشدەر داخرا.

جەوهەر رەسوڵ، بەڕێوەبەری گومرگی راپەڕین بە دوارۆژی راگەیاند: "بەرەبەیانی ئەمڕۆ چوارشەممە شەپۆلێکی چڕی بەفربارین سنوری مەرزی کێلی لە قەزای پشدەری گرتەوە و زیاتر لە نیو مەتر بەفری لێ باریوە، بەو هۆیەشەوە رێگەی هاتوچۆی بازرگانی لە مەرزەکە داخراوە".

وتیشی: "جگە لە سنوری قەزای پشدەر هاوکات لە سنوری شاری سەردەشتی رۆژهەڵاتی کوردستان بەفرێکی زیاتر باریوە، بەو هۆیەشەوە ئۆتۆمبیلە بارهەڵگرەکان نەیانتوانیوە بگەنە مەرزی کێلێ".

باسی لەوەشکرد: بەهۆی زۆری و بەردەوامبوونی ئەو شەپۆلە بەفربارینە لە ئەمڕۆدا ناتوانرێت رێگەکە پاککبرێتەوە.

هاوكات هه‌ر ئه‌مڕۆ بەھۆی بارینی بەفرێکی زۆرەوە رێگەی دەروازەی سەرزێری نێوان باشوری کوردستان و تورکیا لە سنوری قەزای ئامێدی داخرا.

عیرفان سلێمان، بەرێوەبەری دەروازەی سەرزێرێ بە دواڕۆژی راگەیاند: "رێگەی دەروازەی سەرزێری نێوان باشوری کوردستان و تورکیا بە ھۆی بارینی بەفرێکی زۆر رێگەی ھاتۆچۆ داخراوە".

وتیشی: "تیمەکانی رامالینی بەفر دەستیان بە کارەکانیانکردووە و تا ئێستا ٤٥ سم بەفرباریوە رێگاکە لەلای ئەوانیش تا ئێستا نەکراوەتەوە".

ئاماژە بەوەشکرد:" لە حەفتەی رابردووش نزیکەی مەترێک بەفر لە دەروازەی سنوری سەرزێرێ باریبوو، بەڵام تیمەکانی رامالینی بەفریا توانین رێگاکە بکەنەوە وکێشەی ھاتۆچۆمان نەبوو".

لەلایەکی ترەوە ھاشم یەحیا، بەرێوەبەری کەشناسی و بۆمەلەرزە لە قەزای ئامێدی بە دواڕۆژی راگەیاند: "لە شەوی رابردووەوە بەفربارین لە سنوری قەزای ئامێدی دەستیپێکردووە و تا ئێستا بەردەوامە .

وتیشی: "لە سەتنەری قەزای ئامێدی ٣٢سم و لە ناحیەی سەرسنگ ٢٣ و لە کانی ماسێ ٤٦سم وبامەرنێ ٢٤سم و لە ناحیەی چەمانکێ ٩سم بەفرباریوە .

ئاماژە بەوەشکرد، کاریگەری ئەم شەپۆلە بەفربارینە تا ئێوارەی ئەمرۆ چوارشەممە ٩-ی کانوونی دووەم بەردەوام دەبێت و ئەم شەو کوتایی دێت .


پ: س.م



created by Avesta Group and powered by Microsoft Azure