لەسەر کێشەكانى مەرزی پەروێزخان داوایایەک ئاڕاستەی پارێزگاری كرماشان دەکرێت

هەواڵ / ئابوری :: 09/01/2019‌ :: 334‌ جار بینراوە

دواڕۆژ، زریان محەمەد
ژووری بازرگانی و پیشەسازی سلێمانی لەسەر ئەو کێشانەی لە مەرزی پەروێزخان ھەیە چەند داواکارییەک ئاڕاستەی پارێزگاری کرماشان دەکات بۆ باشکردنی کاری بازرگانی لە مەرزەكه‌دا.


ئەحمەد کەلاری، ئەندامی ئەنجومەنی کارگێڕی ژووری بازرگانی و پیشەسازی سلێمانی و نوێنەری بازرگانانی کەلار بەدواڕۆژی وت: "چەند کێشە و گرفتێک لەمەرزی پەروێزخان ھەیه‌ و چارەسەربوونیشى لەلایەن ئێرانەوەیه‌، بۆیە لەگەڵ ژووری بازرگانی و پیشەسازی کرماشان قسەمان کرد و یاداشتێکمان دایە دەست پارێزگاری کرماشان بۆ چارەسەری کێشەکان".

وتیشی: "ئەو کێشانەی ھەمان بووە بە 12 خاڵ ئاڕاستەی پارێزگاری کرماشانمان کردووە، ئەوانیش به‌ڵێنى چارەسەرکردنیان داوە و پێیانڕاگەیاندوین کە بەباشی کاردەکەن بۆ چارەسەرکردنی ئەوکێشانە تا کاری بازرگانی لەو مەرزە برەوی زیاتری پێبدرێت" .

ئەو خاڵانەی کە ئاڕاستەی پارێزگاری کرماشان کراون بریتین لە:

1- چاككردنی رێگەی هاتن و رۆیشتنی ئۆتۆمبێلە بارهەڵگرەكان لەدەروازەی پەروێزخان، ڕێگەی رۆیشتن و گەڕانەوەی ئۆتۆمبێلەكان لەیەك جیابكرێتەوە و بكرێتە دوو ساید.

2- زیادكردنی دەوامی رەسمی لەمەرزی پەروێزخان بۆ 24 كاتژمێری هاوشێوەی دەروازەكانی دیکە وەك باشماخ و حاجی ئۆمەران.

3- كاراكردنی كاری ترانزێت لەدەروازەی پەروێزخانی نێودەوڵەتی هاوشێوەی باشماخ و حاجی ئۆمەران بۆ ئەوەی هەموو كاڵاكان لەوێوە بڕواتە دیوی هەرێمی كوردستان بەشێوەی ترانزێت كە لەئێستادا تەنیا (5) كاڵا ڕێگەی پێدەدرێت.

4- دروستكردنی كۆمیتەیەكی هاوبەش لەمەرزی پەروێزخان لەنێوان بەرپرسانی هەرێمی كوردستان و دەروازەی نێودەوڵەتی پەروێزخان بەبەشداری نوێنەری هەردوو ژووری بازرگانی كرماشان و سلێمانی، لەو كۆمیتەیە چارەسەرى ئەو كێشانەی بكرێت كە له‌مەرزەكەدا روودەدات، ئه‌وه‌ش كاریگەری لەسەر جوڵەی بازرگانی دەروازەكە ده‌بێت.

5- پێشنیار دەكەین كە شوێنی وەستانی ئۆتۆمبێلی بارهەڵگرەكان چاكتر و فراوان بكرێت بۆ ئەوەی داگرتن و باركردنی كاڵاكان ئاسانتربێت و هەر جۆرە كاڵایەك شوێنی تایبەتی خۆی هەبێت.

6- داواكارین بەیانیان بارەكان زووتر بێنەخوارەوە بۆناو مەرزی پەروێزخان بۆ ئەوەی قەرەباڵغی دروست نەبێت.

7- پێشنیار دەكەین بەڕێگرتن لەهێنانی گازوایل و بەنزین بەشێوەی نایاسایی بۆ نێو مەرزی پەروێزخان كە ئەمەش رۆژانە قەرەباڵغی و كێشە دروست دەكات، بۆ ئەو مەبەستەش پێشنیار دەكەین وێستگەی سوتەمەنی كە 2 دانەیە زیادبكرێت بۆ 4 وێستگە.

 

8- پێشنیار دەكەین كارئاسانی تەواوبكرێت بۆ گەڕاندنەوەی ئەو بارانەی لە پشكنین دەرناچن لەدیوی هەرێم واتا كوالێتیان تەواو نیە بۆ ئەوەی زیان بەبازرگانانی هەردوولا نەكەوێت و قەرەباڵغی لەدەروازەكەدا دروست نەبێت.

9- پێشنیار دەكەین بەزیادكردنی ژمارەی ئەو سەربازانەی كە لە دەروازەكە پشكنینی ئۆتۆمبێلە بارهەڵگرەكان دەكەن لەهاتن و گەڕانەوەیاندا بۆ ئەوەی قەرەباڵغی دروست نەبێت و بارەكان بەزوویی بەڕێبکرێن و نەكەونە درەنگانى شەو.

10- ئاگاداری بەڕێزتان دەكەین كە لەدەروازەی پەروێزخان كۆمەڵێك كێشە و گرفت كرێكارەكان لەدیوی ئێران دروستی دەكەن بۆ بازرگانان و شۆفێرەكانمان، بەهۆی داواكردنی بەخشیشی زیادەوە، جگە لەمافی خۆیان بەتایبەت لەكاتی ئێواران و شەودا كە ئەم دیاردەیە بۆتە هۆی ئەوەی چەندجارێك لێدان و ئازاردانی بازرگانان و شۆفێرەكانمان و زیان بەكاڵاكانمان بگەیەنن و دوابكەوێت.

11- وەك بەڕێزتان ئاگادارن دەروازەی پەروێزخان 26 ساڵە كراوەتەوە تائێستا هیچ كێشەیەكی وەها دروستنەبووە كە ببێتە مایەی داخستنی مەرزەكە، بەداخەوە لەماوەی دوو مانگی ڕابردودا دیاردەی مانگرتنی شۆفێرەكان لەدیوی هەرێمی كوردستانەوە روویدا و لە ئەنجامدا بۆ چەند ڕۆژێك دەروازەكە داخرا، ئەمەش بەهۆی ئازاردان و لێدانی شۆفێرەوە بووە لەلایەن سەربازەكانی هەنگی مەرزییەوە، بۆیە داواكارین هەر شۆفێرێك سەرپێچی كرد بەپێی یاسا ڕەفتاری لەگەڵبكرێت نەوەك لێدان.

12- پێشنیار دەكەین كارئاسانی تەواوبكرێت بۆ بازرگانانی مەرزی پەروێزخان بۆ ئەوەی بتوانین  ئۆتۆمبێلی تایبەتی خۆیان تا سەنتەری پارێزگای كرمانشان و شارۆچكەكانی بێن بۆ چاوپێكەوتن و ڕێكخستنی كارەكانیان لەگەڵ هاوتا بازرگانەكانیان لەدیوی ئێران.

پ: س.م



created by Avesta Group and powered by Microsoft Azure