سلێمانی: 100 ژن و مێرد بەشێوازێکی جیاواز دەژین

هەواڵ / ڕاپۆرت :: 09/01/2019‌ :: 5882‌ جار بینراوە

دواڕۆژ، پشتیوان جەمال
ئومێد سەعید، پیاوێکی بەتەمەنی خەڵكی سلێمانییە و ماوەی سێ مانگە لەگەڵ ژنەكەی بەڕەسمی لەدادگا جیابوونەتەوە و ئێستا لەگەڵ سێ منداڵی پێكەوە دەژین، بەڵام ئەو زیاتر لە سێ ساڵ بەتەنیا ژیاوە و خانەوادەكەشی بەجیا ژیاون.


ئومێد سەعید 63 ساڵ لە تەمەنی رۆیشتووە و رەنگە هیچ كاتێك بیری لەوە نەكردبێتەوە رۆژێك لەڕۆژان بگاتە ئەو تەمەنە و ببێتە یەكێك لەو پیاوانەی ئێستا لەشاری سلێمانی بەو جۆرە ژیان بەسەر دەبەن كە بەهۆی دروستبوونی كێشەی خێزانییەوە، نە بە رەسمی لەخێزانەكانیان جیابوونەتەوە و نە پێكەوەش دەژین.

ئومێد كاسبكارێكی بەتەمەنە و شەڕواڵ و چاكەتێكی لەبەردایە و هەمیشەش كڵاوێكی لەسەرە، ئەو خاوەنی چوار منداڵە و بە خەفەتێكی زۆرەوە قسەی بۆ دواڕۆژ كرد و وتی: "بەهۆی كوڕە گەورەكەمەوە لەگەڵ خێزانەكەم تووشی كێشە بووین، چونكە ئەو كوڕەم هەمیشە لەدەرەوە كێشەی بۆ دروست دەكردین و دایكیشی پشتی دەگرت، ئیدی ژیانمان بەو جۆرەی لێهات".

بەوتەی ئەو پیاوە، سەرەتا ژنەكەی خانووەكەی لێ داگیركردووە، بەڵام دوای چەند ساڵێك لەڕێگەی دادگاوە 25%ی بەشی خۆی لەخانووەكە وەرگرتۆتەوە و بەوتەی خۆی، ژنەكەی سێ منداڵیشی لەماڵەكەی دەركردووە و ئێستا لای ئەو دەژین.
   
بەپێی ئاماری یەكێتی پیاوانی كوردستان كە بە دواڕۆژ دراوە، لەشاری سلێمانی زیاتر لە 100 ژن و مێرد نە پێكەوە دەژین و نە بە رەسمیش جیابوونەتەوە، بەڵكو هەریەكەیان لە شوێنێك دەژین.

بورهان عەلی، سكرتێری یەكێتی پیاوانی كوردستان بە دواڕۆژی راگەیاند: لە سلێمانی حاڵەتێكی نوێی پێكەوەژیانی ژن و مێرد پەیدا بووە، ئەو ژن و مێردانە هەرچەندە بەیاسا پێكەوەن، بەڵام بەداخەوە پیاو لەشوێنێك و ژنەكەش لەشوێنێكی دیكە دەژی و خەریكە دەبێتە دیاردە.

ناوبراو بەداخە لەوەی كە بەهۆی تێنەگەیشتنی ژن و پیاوەوە ئەو كەسانە بەو شێوەیە دەژین و وتی: "نە ئاستی رۆشنبیریشیان وایە پێكەوە بژینەوە، نە جیاش دەبنەوە، منداڵەكانیش زۆرجار لای دایكیان دەژین".

كوردە عەبدولكەریم، توێژەری كۆمەڵایەتی ئەو حاڵەتەی بۆ دواڕۆژ روونکردەوە: دوو هۆكار بۆ پێكەوەژیانی ئەو جۆرە خێزانانە هەیە، یەكێكیان لایەنی یاساییە كە ئەو خێزانانە دەیانەوێت تا دادگا بەڕەسمی لێكیان جیادەكاتەوە بەو شێوەیە بژین، جۆری دووەمیش ئەوەیە ئەو خێزانانە لەبەر كۆمەڵگە نایانەوێت جیاببنەوە، بۆیە پێیان باشترە بەو جۆرە بژین.

ناوبراو باسی نموونەی پێكەوەژیانی ژن و مێردێكی دیكەی كرد و وتی: "هاوڕێیەكی خۆم زیاتر لە پێنج ساڵە كێشەیان هەیە، بەڵام لەبەر منداڵەكانیان جیانابنەوە، ئێستا لەماڵێكدا دەژین و پێكەوە قسەش ناكەن، مەگەر هەندێك قسەی زۆر رۆتینی نەبێت".

لەوبارەیەوە عومەر گوڵپی، بەڕێوەبەری گشتی چاودێری كۆمەڵایەتی سلێمانی لە لێدوانێكدا بۆ دواڕۆژ رایگەیاند: تائێستا تەنیا یەك حاڵەتی لەو شێوەیە هاتۆتە لامان كە ژنێك بووە و ویستویەتی هاوكاری بكەین، بەڵام بەهۆی قەیرانی داراییەوە، ئەو هاوكارییانە راگیراون. 

پ: ن.ر



  • ڕۆژ
  • هەفتە
  • مانگ
created by Avesta Group and powered by Microsoft Azure