لەساڵی ڕابردوودا ئاگر زیانی زیاد لە 170 ملیۆن دیناری لە هەڵەبجە داوە

هەواڵ / کوردستان :: 07/01/2019‌ :: 255‌ جار بینراوە

دواڕۆژ، عەلی حەمە سەعید
بەرگری شارستانی هەڵەبجە رایدەگەیەنێت: ساڵی رابردوو 368 حاڵەتی ئاگركەوتنەوە تۆماركراوە کە زیانی 177 ملیۆن دیناری بەدواوە بووە.


نیوەڕۆی ئەمڕۆ دووشەممە، لە كۆنگرەیەكی ڕۆژنامەوانیدا وتەبێژی بەڕێوەبەرایەتی بەرگری شارستانی هەڵەبجە ئاماری كاروچالاكی و ئاگركەوتنەوەكانی سنورەكەی لەساڵی ڕابردوودا بۆ كەناڵەكانی ڕاگەیاندن خستەڕوو، بە جۆرێك 368 حاڵەتی ئاگركەوتنەوە تۆماركراون زیانی 177 ملیۆن دیناریش بەر شارەكە كەوتووە.

نەقیب زانیار عومەر، وتەبێژی بەڕێوەبەرایەتی بەرگری شارستانی هەڵەبجە لە كۆنگڕە ڕۆژنامەوانییەكەدا ئاماژەی بەوەكرد، لە 1/1/2018 تا 31/12/2018 لە سنوری پارێزگای هەڵەبجە 368 حاڵەتی ئاگر كەوتنەوە تۆماركراون لەو ژمارەیەش 245 حاڵەتیان لە شاخ و دەشتەكاندا ڕوویانداوە و 25 ڕووداوی سوتانی ئۆتۆمبێل و 30 ڕووداوی سوتانی ماڵان تۆمار كراون.

ئەوەشی خستەڕوو، هەر لەساڵی ڕابردوودا 30 حاڵەتی سوتانی باخی هاوڵاتیان و 24 حاڵەتی سوتانی شوێنی گشتی و نۆ حاڵەتی روودانی لافاو تۆمار كراون، هاوكات زیانی سەرجەم ڕووداوەكان لە ساڵی ڕابردوودا بریتی بووە لە 177 ملیۆن و 420 هەزار دینار، بەڵام هیچ زیانێكی گیانی تۆمار نەكراوە، هاوكات پشكنیش بۆ 535 شوێنی بازرگانی و شوێنی گشتی ئەنجام دراوە.

هەر لە كۆنگرە ڕۆژنامەوانییەكەدا وتەبێژەكەی بەڕێوەبەرایەتی بەرگری شارستانی هەڵەبجە ئەوەشی وت: "تۆماركردنی حاڵەتەكانی ئاگركەوتنەوە و ڕووداوە جۆراوجۆرەكان بە بەراورد بە ساڵی 2017 كەمیان كردووە بەجۆرێك لە ساڵی 2017 كۆی گشتی ڕووداوەكان 559 حاڵەت بووە، بەڵام لەساڵی 2018 ژمارەكە كەمبووەتەوە بۆ 368 حاڵەت، هەروەها بە بەراورد بەساڵی 2017 ژمارەی پشكنینەكانمان 60 پشكنین زیادیان كردووە.


پێداچوونەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure