بەڕێوەبەری بەشی میوزیك لە سلێمانی: چالاكییەكانی ساڵی رابردوو زۆر دیار نەبوون

هەواڵ / که‌لتور :: 04/01/2019‌ :: 408‌ جار بینراوە

تاگ :: سلێمانی

دواڕۆژ، پشتیوان جەمال
بەڕێوەبەری بەشی میوزیك لە بەڕێوەبەرایەتی رۆشنبیری سلێمانی رایدەگەیەنێت: ساڵی رابردوو بە دەیان چالاكی میوزیكی ئەنجامدراون، بەڵام هەموویان ئاسایی بوون و زۆر دیارنەبوون.


نەجات ئەمین، بەڕێوەبەری بەشی میوزیك لەبەڕێوەبەرایەتی گشتی رۆشنبیری و هونەر لە سلێمانی بەدواڕۆژی راگەیاند :"ئامارێكی ورد نییە سەبارەت بەو چالاكییە هونەرییە میوزیكییانەی كە ساڵی رابردوو لەشاری سلێمانی ئەنجامدراون، بەڵام دەكرێت بڵێین: بە دەیان چالاكی كراون ئەوانیش كۆنسێرتی گۆرانی و میوزیك بوون".

وتیشی :"ئەو چالاكییانە 99%یان ناوخۆیی بوون و 1%یان نێودەوڵەتی بوون، چالاكییە نێودەوڵەتییەكانیش پرس بە ئێمە ناكەن، بەڵكو لە تەلەفزیۆنەوە گوێمان لێی دەبێت گروپێك كە نایناسین و قەت نەمانبینیون هاتوون".

دەربارەی ئەوەی چالاكییە دیارە میوزیكییەكان لە ساڵی رابردوو چی بوون، بەڕێوەبەری بەشی میوزیك دەڵێت :"هەموویان ئاسایی بوون و زۆر دیار نین، بەڵام لەبەر دۆخەكە دەبێت بڵێین چالاكی بوون".

نەجات ئەمین جەختیكردەوە :"ساڵی رابردوو بانگهێشت هاتووە بۆ میوزیسیانانی سلێمانی تا سەردانی دەرەوەی وڵات بكەن بۆ ئەنجامدانی چالاكی، بەڵام بەهۆی قەیرانی داراییەوە ماوەی سێ ساڵە هیچ سەردانێك بۆ دەرەوە نەكراوە".

شاری سلێمانی پایتەختی رۆشنبیری هەرێمی كوردستانە و بەپێی زانیارییەكانی دواڕۆژ، لە ناوەڕاستی ساڵی رابردووەوە نزیكەی 10 گۆرانیبێژ لە شاری سلێمانی ئەلبومی گۆرانییان بڵاوكردووەتەوە، ئەوە جگە لەئەنجامدانی چەند كۆنسێرتێك لە هۆڵەكان.

پ: ن.ر



created by Avesta Group and powered by Microsoft Azure