مەرزێکی نوێ لەنێوان هەرێم و ئێران دەکرێتەوە

هەواڵ / کوردستان :: 30/12/2018‌ :: 1175‌ جار بینراوە

دواڕۆژ، عەلی حەمەسەعید
بە مەبەستی کردنەوەی مەرزی سازان لەسنوری پارێزگای هەڵەبجە، شاندێکی کونسڵخانەی ئێران لەگەڵ پارێزگار و جێگری پارێزگاری هەڵەبجە بەشێوەیەکی مەیدانی سەردانی مەزەکەیان کردوە و چاوەڕێی رەزامەندی وەزارەتی دەرەوەی ئێران دەکەن بۆ کردنەوەی مەرزەکانی سنورەکە.


ئازاد تۆفیق، پارێزگاری هەڵەبجە بەدواڕۆژی راگەیاند: دوای ئەوەی هەفتەی پێشوو سەردانی کونسڵخانەی ئێران-مانکرد لە سلێمانی و لەگەڵ بەرپرسانی کونسڵخانەکە کۆبووینەوە بەمەبەستی دروستکردنی هەماهەنگی زیاتر لە نێواماندا، هەر ئەمڕۆ شاندێکی کونسڵخانەی ئێران هاتنە هەڵەبجە.

وتیشی: "لەگەڵ جێگری کونسڵی ئێران لە سلێمانی و لێپرسراوی بەشی ئابوری کونسڵخانەی ئێرانی بە شێوەیەکی مەیدانی سەردانی مەرزی سازانمان کرد، لایەنی ئێرانیش جددی بوونی خۆیان لە کردنەوەی مەرزی سازان نیشاندا و هاوکات ئەوەش دوپاتکرایەوە کە کردنەوەی مەرزەکانی دیکەش تەنیا رەزامەندی وەزارەتی دەرەوەی ئێرانی پێویستە".

پارێزگاری هەڵەبجە ئەوەشی وت: "عەمید سالار عەبدوڵا، بەڕێوەبەری گشتی پاسپۆڕتی سلێمانی و ئەندامی لیژنەی دەروازە سنورییەکانی هەرێم لەگەڵ شاندەکەی کونسڵخانەی ئێران  بە رەسمی کردنەوەی مەرزەکانی تەوێڵە، شوشمێ، پشتە، سەیرانبەن و کێلێ گفتوگۆی جددیان لەسەر کرا و شاندەکەی ئێران کردنەوەی ناوچەی بازرگانی ئازادی لە نێوان هەڵەبجە و شارەکانی ئێران بە پێویستی زانی، بۆ ئەو مەبەستەش ڕاپۆرتێک بۆ وەزارەتی دەرەوەی ئێران ئامادە دەکەن".

پ: ن.ر



created by Avesta Group and powered by Microsoft Azure