بۆ دۆزینەوەی منداڵەكانیان هەڵەبجەییەكان دەچنە ئێران

هەواڵ / کوردستان :: 27/12/2018‌ :: 373‌ جار بینراوە

دواڕۆژ، عەلی حەمەسەعید
ڕێكخراوێک بۆ دۆزینەوەی منداڵانی ونبووی هەڵەبجە لەگەڵ لایەنی ئێرانیدا ڕاستەوخۆ دەست بە گەڕان دەكات بۆ دۆزینەوەی منداڵە ونبووەكان.


ماردین مەحمود، سەرۆكی ڕێكخراوی منداڵە ونبووەكان لەھەڵەبجە بەدواڕۆژی ڕاگەیاند: بەمەبەستی خێراكردنی هەنگاوەكانی دۆزینەوەی منداڵە ونبووەكانی هەڵەبجە و شادكردنەوەیان بە كەسوكارەكانیان، چوار شەممە 26/12/2018 لەگەڵ خێزانی منداڵە ونبووەكاندا كۆبووینەتەوە تا دوا ئامارمان لەبارەی منداڵە ونبووەكانەوە دەستبكەوێت.  

ئاماژەی بەوەشكرد: بەگوێرەی كۆتا ئامار كە وەرمانگرتووە 74 خێزانی هەڵەبجەیی چاوەڕێی گەڕانەوەی 191 منداڵی ونبوویان دەكەن کە لەو ژمارەیە 83 كوڕ و 108 یان كچن.

ماردین دەڵێت: "نوێنەری خۆیان ناردۆتە ئێران بۆ دروستكردنی هەماهەنگی لەگەڵ لایەنە پەیوەندیدارەكانی ئێران بۆ ئەوەی لە نزیكترین كاتدا خۆیان بە شێوەیەكی ڕاستەوخۆ بڕۆنە ئێران و دەستبكەن بە گەڕان بە دوای منداڵە ونبووەكاندا".

سەرۆكی ڕێكخراوی منداڵە ونبووەكان ئەوەشی خستەڕوو: جیاواز لەو 10 منداڵەی كە لە ماوەكانی ڕابردوودا دۆزراونەتەوە و خۆیان گەڕاونەتەوە هەڵەبجە، لە ئێستادا دوو منداڵی دیكە دۆزراونەتەوە كە بانگەشەی ئەوە دەكەن منداڵی ونبووی هەڵەبجەن و لە ئێرانن، هاوكات یەكێك لەو منداڵانە بەڵگەی بەهێزی لایە كە منداڵی ونبووی هەڵەبجەیە و منداڵەكەی دیكەش پێویستی بە گرتنەبەری هەندێك ڕێوشوێنە بۆ ئەوەی بیانگەڕێنینەوە بۆ هەڵەبجە.

پێداچوونەوە: ئارام غەفور



created by Avesta Group and powered by Microsoft Azure