هۆکاری باسنەکردنی داهاتی نەوتی کەرکوک لەبودجەی 2019 ئاشكرابوو

هەواڵ / ئابوری :: 23/12/2018‌ :: 305‌ جار بینراوە

دواڕۆژ، عیماد جەباری
لەبودجەی گشتی ساڵی 2019دا کە لەلایەن ئەنجومەنی نوێنەرانەوە خوێندنەوەی یەکەمی بۆ ئەنجامدراوە، هیچ ئاماژەیەک بەداهاتی نەوتی کەرکوک نەکراوە.


بێستون عادل، ئەندامی ئەنجومەنی نوێنەران بەدواڕۆژی وت: "لەدوای ساڵی 2014 کە نەوتی کەرکوک بەهاوبەشی لەنێوان بەغدا و هەولێر رەوانە دەکرا، لەپڕۆژەیاسای بودجەشدا ئاماژە بە داهاتی نەوتی شارەکە دەکرا، چونکە بەردەوام یەکێک بوو لەو خاڵانەی لەدانوستانەکاندا رێککەوتنی لەسەر دەکرا".

سەبارەت بەهۆکاری ئاماژەنەکردن بەداهاتی نەوتی کەرکوک لەبودجەی گشتی ساڵی 2019دا، وتی: "لەئێستادا داهاتی تەواوی نەوتی کەرکوک دەچێتەوە بۆ بەغدا ئەگەرچی لەڕێگەی بۆڕی نەوتی هەرێمەوە رەوانە دەکرێت، ئەمه‌ش وایکردوە پێویست نەکات ئاماژەی پێبکرێت".

ساڵانی رابردوو بەپێی رێککەوتنێک هەرێم سەرپەرشتی فرۆشتنی بەشێکی نەوتی کەرکوکی دەکرد لەو کێڵگانەی کۆمپانیای کار لەرۆژئاوای شارەکەدا دەستی بەسەریدا گرتبوو و کاری دەرهێنانی تێیدا دەکرد، بەڵام لەئۆکتۆبەری ساڵی رابردوەوە حکومەتی عێراق لەڕێگەی بەکارهێنانی هێزی سەربازییەوە سەرجەم ئەو کێڵگانەی گەڕاندەوە ژێر دەستی خۆی.

لەمانگی تشرینی دووەمی ئەمساڵیشەوە هەناردەی نەوتی پارێزگاکە دەستیپێکردەوە، دوای ئەوەی رێککەوتن لەنێوان هەرێم و بەغدا ئەنجامدرا.

لەبارەی وردەکاری رێککەوتنەکەش، بێستون عادل رونیکردەوە: هەفتەی داهاتوو لیژنەی دارایی سەردانی هەولێر دەکەن بۆ تاوتوێکردنی چەند پرسێک لەنێویاندا رێكکەوتن لەسەر نەوتی کەرکوک ئەو کات وردەکارییکەی رووندەبێتەوە.

پ: س.م



created by Avesta Group and powered by Microsoft Azure