فەرمانی دەستگیرکردن بۆ پارێزگاری كاتیی كەركوك دەرکرا

هەواڵ / کوردستانی :: 19/12/2018‌ :: 1404‌ جار بینراوە

دواڕۆژ، عیماد جەباری
دەستەی دەستپاکی کەرکوک فەرمانی دەستگیرکردنی دەرکردووە بۆ راکان جبوری پارێزگاری کاتی کەرکوک و ناوبراو شارەکەی بەرەو بەغدا بەجێهێشتووە.


غەفور ساڵح جێگری مەڵبەندی کەرکوکی یەکێتی نیشتمانی کوردستان ئەمڕۆ چوارشەممە 19ی کانونی یەکەم بەدواڕۆژی وت: "دادوەری تایبەت بەدەستەی دەستپاکی لەدادگای کەرکوک فەرمانی دەرکردووە بۆ دەستگیرکردنی راکان جبوری پارێزگاری کاتی کەرکوک و هێزە ئەمنییەکانی راسپاردووە دەستگیری بکەن و بیهێننە بەردەم دادگا".

وتیشی: "هێزێکی ئەمنی بۆ جێبەجێکردنی ئەو فەرمانە چونەتە سەر باڵەخانەی پارێزگا و دواتر هەڵیانکوتاوەتە سەر ماڵەکەی، بەڵام دەرکەوتووە بەفەرمانەکەی زانیوە و بەرەو بەغدا رۆیشتووە".

ئاماژەی بۆ ئەوەشکرد کە زانیارییان هەیە راکان جبوری بۆ خۆدەربازکردن لەو بڕیارە سبەی لەدانیشتنی پەرلەماندا سوێندی یاسایی بخوات و کوردیش هەموو هەوڵی خۆی دەدات سوێندخواردنەکەی دوابکەوێت بۆ ئەوەی دەستگیر بکرێت.

سەبارەت بەهۆکاری دەستگیرکردنەکەی، بەرپرسەکەی یەکێتی وتی: "هۆکارەکەی گەندەڵییە، چونکە لەماوەی دەستبەکاربوونی دەیان گەندەڵی ئەنجامداوە".


پێداچوونەوە: ئارام غەفور 



created by Avesta Group and powered by Microsoft Azure