"لەسەر ئاستی پارێزگای سلێمانی، پێنجوێن لەبوونی میندا یەكەمە"

هەواڵ / کوردستان :: 19/12/2018‌ :: 331‌ جار بینراوە

تاگ :: كوردستانى

دواڕۆژ، رێبین حەسەن
تا ئێستا نزیكەی تەنیا لە (30%)ی زەوییە مینڕێژكراوەكانی پێنجوێن لەمین پاككراونەتەوە و بەهۆی زۆری مینیشەوە، لەسەر ئاستی پارێزگای سلێمانی، پێنجوێن لەپلەی یەكەمدایە.


زانا رەحمان، قایمقامی قەزای پێنجوێن، بەدواڕۆژی راگەیاند: ئەمڕۆ لەمیانی پێشوازیكردنمان لەسەرۆكی لیژنەی ڕادەستكردنەوەی زەوییە پاككراوەكان لەمین كە سەر بە بەڕێوەبەرایەتی گشتی مینی سلێمانین، چەند زەوییەكی لەمین پاككراویان لەگەڕەكی كانی گوێژ و كەلاوەكانی و كانی بەر ماڵانیان، بەڕووبەری (17) هەزار مەتر دووجا، دوای پاككردنەوەیان ڕادەستی قایمقامیەتی قەزای پێنجوێن كردەوە.


جەلال ئەمین، سەرپەرشتیاری بەشی هۆشیاری لەبەڕێوەبەرایەتی گشتی كاروباری مینی سلێمانی، بەدواڕۆژی راگەیاند: بەو هۆیەی رێژەیەكی بەرچاو لەزەوییەكانی سنووری پێنجوێن، لەماوەی شەڕی هەشت ساڵەی (عێراق – ئێران ) لەلایەن دەسەڵاتدارانی ئەو كاتەی هەردوو وڵاتەكەوە مینڕێژكراوە، بۆیە تا ئێستا تەنیا رێژەی (30%)ی زەوی ناوچەكە لەمین پاككراوەتەوە".
باسی لەوەشكرد: هێشتا مەترسیی لەسەر ژیانی دانیشتوانی سنووری قەزای پێنجوێن و دەوروبەری هەیە، بۆیە بەردەوامین لەوتنەوەی وانەی هۆشیاری بەخوێندكارانی قۆناغە جیاوازەكانی خوێندن و هەڵمەتێكیشمان بۆ دەرخستنی مەترسییەكانی مین لەسنوورەكە دەستپێكردووە.

ئاشكراشیكرد: پێنجوێن ناوچەیەكی كارەساتبارە و هێشتا مینێكی زۆر لەسنوورەكەدا هەیە و بەشێكی زۆری زەوییەكانی ئەو ناوچەیە مینی تێدا ماوە و پاك نەكراوەتەوە، واتە هێشتا مەترسی ماوە.

بەپێی ئامارێكی بەڕێوەبەرایەتی مینی سلێمانی، كە وێنەیەكی تایبەت دراوەتە دواڕۆژ، لەكۆی نزیكەی (60) ملیۆن مەتر دووجا مین، تاكو ئێستا توانراوە نزیكەی (10) ملیۆن مەتر دووجا پاك بكرێتەوە و پێنجوێنیش پلەی یەكەمی هەیە لەبوونی مین لەسنووری پارێزگای سلێمانی، بەڵام بەهۆی سەختی ناوچەكە ‌و ساردبوونی كەشوهەواوە، ساڵانە تەنیا دەتوانرێت چوار مانگ كار بكرێت بۆ پاككردنەوەی زەوییە مینڕێژكراوەكان.

قەزای پێنجوێن، نزیكەی 96 كیلۆمەتر لەشاری سلێمانیەوە دوورە و دەكەوێتە باكوری رۆژهەڵاتی پارێزگای سلێمانی، بەهۆی شەڕی هەشت ساڵەی نێوان (ئێران و عێراق) هێشتا بەشێكی زۆری كێڵگە و شاخەكان و تەنانەت چەند كۆڵانێكی مین ڕێژكراوە و تائێستا لەزۆرێك لەكێڵگەكانی نزیك شارەكەدا ماون.



پێداچوونەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure