لە یادی لەدایكبوونیدا دیواربەندییەك بۆ حەسیب ساڵح دانرا

هەواڵ / کوردستان :: 12/12/2018‌ :: 580‌ جار بینراوە

تاگ :: سلێمانى

دواڕۆژ، پشتیوان جەمال
لە ساڵیادی لەدایكبوونیدا، دیواربەندییەك بۆ حەسیب ساڵح، ئەندازیاری ناسراوی عێراقی له‌ سلێمانى دانرا.


پاشنیوەڕۆی ئەمڕۆ چوارشەممە 12ی كانوونی یەكەمی 2018، بە ئامادەبوونی ژمارەیەك له‌ كەسوكار و هاوڕێی ئەندازیار حەسیب ساڵح، لە ئوتێل سلێمانی پاڵاس (كه‌ پێشتر به‌ ئوتێل حەسیب ساڵح به‌ناو بوو) مەراسیمێك سازكرا و دیواربەندییەكی بۆ دانرا.

خەلیل عەبدوڵا، بەڕێوەبەری گشتی دیوان لە وەزارەتی رۆشنبیری و لاوان، كە سەرپەرشتی مەراسیمەكەی دەكرد، بە دواڕۆژی راگەیاند: بیرۆكەی مەراسیمەكە لەلایەن ئەوەوە دانراوە لەبەرئەوەی حەسیب ساڵح ئەندازیار و بەڵێندەرێكی نیشتمانپەروەر بووە و بەبۆنەی لەدایكبوونی ویستوویانە رێزی لێبگرن، دیواربەندییەكە لەلایەن هونەرمەند زاهیر سدیق دروستكراوە و ئەلبومێكی تایبەت بە ژیانیشیان وەكو رێزلێنان بڵاوكردەوە.

هاوكات فاروق مەلا مستەفا، سەرمایەداری نیشتمانی و هاوڕێی كۆچكردوو بە دواڕۆژی راگەیاند: جێی دڵخۆشییە ئەمڕۆ دیواربەندی بۆ ئەو كەسایەتییە دەستپاكە دروست دەكرێت، حەسیب ساڵح ئەندازیارێكی زیرەك و هەڵكەوتووی گەورەیە و توانی ناوی لە بەغدای پایتەختی عێراق بڵاوبێتەوە.

فاروق مەلا مستەفا وتیشى: "كاتی خۆی كە باڵەخانەی سلێمانی پاڵاسی ئێستا كرایەوە، حەسیب ساڵح خاوەنی باڵەخانەكە بوو و منیش وەكو گەنجێك لەوێ ژمێریار بووم".

هەروەها ژیان حەسیب ساڵح، كچی كۆچكردوو بە دواڕۆژی وت: راستە باوكم لەڕێگەی تەلاری حەسیب ساڵح-ەوە زیاتر لای خەڵكی ناسرا، بەڵام وەك ئەندازیار و بەڵێندەرێكی شارەزا شوێن پەنجەی بە هونەری تەلارسازی و ئاوەدانی لە سەرانسەری كوردستان و عێراقدا دیارە و ئەو تەلارانەی دروستی كردوون وەك یادگاری ماونەتەوە.

ژیان ئاشكرایكرد: باوكی لەڕێگەی پڕۆژەكانی تەلارسازی و هاوكاری خوێندكاران و هەژارانەوە، خزمەتی بە گەل و نیشتمان كردووە، لەڕوانگەی بایەخدانی بە زانست و رۆشنیریش، لەكاتی خۆی لەسەر ئەرك و بودجەی خۆی چەندین تەلاری دیكەی دروستكردووە.
 
حەسیب ساڵح لە 12-12- 1930 لەشاری كەركوك لەدایكبووە، بەڵام بەڕەچەڵەك خەڵكی گوندی خەرپانێی ناوچەی هەورامانە و ساڵی 1954 یەكەمی بەشی شارستانی كۆلێجی ئەندازیاریی زانكۆی بەغدا بووە، رۆژی 18-2-2012 لە شاری عەمانی پایتەختی ئوردون كۆچی دوایی كردووە و لەسەر راسپاردەی خۆی لە كەركوك نێژراوە.

پێداچونه‌وه‌: شیروان شه‌ریف



created by Avesta Group and powered by Microsoft Azure