سیناتۆرێك: ئەمریكا نەبوایە سعودییەكان بە زمانی فارسی قسەیان دەكرد

هەواڵ / ڕاپۆرت :: 10/12/2018‌ :: 492‌ جار بینراوە

دواڕۆژ
رۆژی سێ‌ شەممە 4ی كانونی یەكەم، جینا هاسبڵ بەڕێوەبەری دەزگای هەواڵگری ئەمریكا، كۆبوونەوەیەكی داخراوی لەگەڵ ئەندامانی هەردوو لیژنەی پەیوەندییەكانی دەرەوە و هێزە چەكدارەكان-ی سەر بە ئەنجومەنی پیران، ئەنجامدا.

تەوەری سەرەكیی ئەو كۆبوونەوەیە دۆسیەی كوشتنەكەی جەمال خاشقچی رۆژنامەنووسی سعودیە بووە كە رۆژی 2ی تشرینی یەكەمی 2018 لە ناو بارەگای كونسڵخانەی سعودیە لە شاری ئەستانبوڵ-ی توركیا بێسەروشوێنكرا و دواتر هەواڵی كوشتنەكەی ئاشكرابوو. 

دوای كۆبوونەوەكە، لیندسی گراهام سیناتۆری كۆماریەكان، لەلایەن كەناڵی فۆكس نیوز-ی ئەمریكیەوە میوانداری كرا و دیدارێكی لەگەڵ بەرنامەی (سەندای مۆرنینگ فیوچەرز) سازكرد.

ئەمەی خوارەوە پوختەیەكی وەرگێڕدراوی قسەكانی ئەو سیناتۆرەیە كە خۆی یەكێك بوو لە بەشدار و ئامادەبوانی كۆبوونەوە داخراوەكەی رۆژی 4ی كانونی یەكەم.
(هەر سیناتۆرێك ئامادەی كۆبوونەوەكەی خاتوو جینا هاسبڵ بووبێت، كە وردەكارییەكانی كوشتنی جەمال خاشقچی-ی روونكردوە و چووە بنجوبناوانی، هیچ گومانێكی نامێنێت لە تێوەگلانی محەمەد بن سەلمان جێنشینی سعودیە لە كوشتنی خاشقچی دا).

 (ئەو كەسەی كە بەرپرسیاری جێبەجێكردنی كردەوەی كوشتنەكەی خاشقچی-یە، دەستەڕاستی خودی محەمەد بن سەلمان-ە).

(بن سەلمان، تەنیا خۆی بۆ خاشقچی مەلاس نەداوە، بەڵكو زۆركەسی تری لە وڵاتانی تردا دەستگیركردووە و بردوونیەتەوە بۆ سعودیە، تەنیا لەبەر ئەوەی رەخنەیانگرتووە).

(محەمەد بن سەلمان، سەعد حەریری سەرۆك وەزیرانی لوبنانی دەستبەسەر كرد، بیست ساڵە شتێكی وا سەیرم نەدیوە، ئەم كارانەی بن سەلمان بەردەوام و بەردەوام دەبن).

(سعودییەكان زۆر پێویستیان بە ئێمە هەیە، زۆر زیاتر لەوەی ئێمە پێویستمان پێیانە، ئەوان رێژەی 9%ی داهاتی نەوتیمان بۆ دابین دەكەن بۆیە زۆر لەوە كەمتر پێویستمان پێیانە كە ئەوان پێویستیان بە ئێمەیە).

(من دژی بیرۆكەی دروستكردنی پەیوەندیم لەگەڵ رژێمێكی تاوانباری خوێنڕێژی وەك محەمەد بن سەلمان-دا بۆ پاراستنی ئەمریكا لە ئێران، بەپێچەوانەوە بەهاوكارییمان لەگەڵ بن سەلمان خۆمان زیان بە تواناكانی خۆمان لە ناوچەكەدا دەگەیەنین، بۆیە هەرگیز پشتگیریی هیچ رێككەوتنێكی فرۆشتنی چەك بە سعودیە ناكەم).

(سوپای سعودیە توانای شەڕكردن و بەرەنگاربوونەوەی ئاڵنگارییەكانی خۆرهەڵاتی ناوەڕاستی نییە بە ئێران-یشەوە).

(ئەگەر ویلایەتە یەكگرتووەكان نەبوایە، لەماوەی تەنیا هەفتەیەكدا دەبوو سعودیەكان بە زمانی فارسی قسەیان بكردایە).

وەرگێڕان: لوقمان محەمەد رەشید



created by Avesta Group and powered by Microsoft Azure

بەپەلە