کەرکوک؛ رێخراوێکی تورکی پرۆسەی نۆژەنکردنەوەی قەیسەرییەکەی دەستپێکرد

هەواڵ / کوردستان :: 07/12/2018‌ :: 377‌ جار بینراوە

تاگ :: كه‌ركوك

دواڕۆژ، عیماد جەباری
رێخراوێکی تورکی دەستپێکردنی پرۆسەی نۆژەنکردنەوەی قەیسەرییەکەی کەرکوکی راگەیاند. ئەوەش لەکاتێکدایە شوێنەواری کەرکوک رایدەگەیەنێت بۆ نۆژەنکردنەوەی قەیسەریە سوتاوەکە چاوەڕێی فەرمانی دادگا دەکەن.

شەیدا ئەحمەد جێگری شوێنەواری کەرکوک بەدواڕۆژی وت: "چاوەڕێی دادگای کەرکوکین رێگا بدات بۆ ئەوەی پرۆسەی نۆژەنکردنەوەی قەیسەریە سوتاوەکە دەستپێبکەین، چونکە هێشتا قەیسەرییەکە شوێنی لێکۆڵینەوەیە".

وتیشی: "رێکخراوی تیکای تورکی ئامادەیی دەربڕیوە بۆ نۆژەنکردنەوەی قەیسەرێکە و رێوشوێنەکانیشی گرتوەتەبەر بەڵام بەسەرپەرشتی شوێنەوار پێویستە ئەنجامبدرێت تاوەکو بەشێوازی پێشووی خۆی نۆژەنبکرێتەوە و نەشێوێندرێت".

بەڵام رێکخراوی تیکای تورکی لەماڵپەری فەرمی لەتۆڕی کۆمەڵایەتی فەیسبوک کۆمەڵێک وێنەی بڵاوکردوەتەوە و نوسیوێتی: لەچوارچێوەی دەستپێشخەریەکی رەجەب تەیب ئەردۆغان کارکردن لەقەیسەری دێرینی کەرکوک کە بەهۆی ئاگرەوە سوتا دەستیپێکرد و پرۆسەی لابردنی خۆڵ و خاشاکەکانی ئەنجامدرا.

بەپێی زانیاریەکانیش رێکخراوەکە بەڵێنیداوە کە لەماوەی دوو مانگدا پرۆسەی نۆژەنکردنەوەکە تەواوبکات.

رۆژی 26ی تشرینی دووەم بەهۆی ئاگرکەوتنەوە لەقەیسەری دێرینی کەرکوک سەرجەم دوکانەکانی سوتاون و بەپێی خەمڵاندنەکان زیانەکانی زیاتر لە 20 ملیۆن دۆلارە.

لە30ی تشرینی دووەمیش فاتیح یەلدز باڵیۆزی تورکیا لە عێراق سەردانی قەیسەرییەکەی کرد و ئامادەیی وەڵاتەکەی نیشاندا بۆ نۆژەنکردنەوەی ئەو شوێنەوارە عوسمانیە.

پێداچوونەوە: ن.ر





created by Avesta Group and powered by Microsoft Azure