فه‌وجى كاكه‌ییه‌كان هه‌ڕه‌شه‌ى كشانه‌وه‌ له‌سه‌نگه‌ره‌كان ده‌كه‌ن

هەواڵ / کوردستان :: 07/12/2018‌ :: 1235‌ جار بینراوە

دواڕۆژ، عیماد جەباری
بەهۆی خەرجنەکردنی مووچەکانیان لەلایەن حکومەتی عێراقەوە، فەوجە کاکەییەکەی حەشدی بابلیون هەڕەشەی کشانەوە دەکات لەسەنگەرەکانی داقوق.


ئومێد حسێن، فەرماندەی فەوجی کاکەییەکانی حەشدی بابلیون بەدواڕۆژی وت: "ساڵێک و دوو مانگە بەشێوەیەکی خۆبەخش سەرقاڵین گوندەکانی کاکەیی دەپارێزین لەقەزای داقوق و هێشتا دەستەی حەشدی شەعبی بەبیانوی پێکنەهێنانی حکومەتی نوێوە مووچەی بۆ خەرجنەکردوین".

وتیشی: "بڕیامانداوە چیتر چاوەڕێی بەڵێنەکان نەکەین و سەنگەرەکان بەجێبهێڵین چونکە چەکدارەکانمان ناچارن بۆ پەیداکردنی بژێوی ژیانیان دەستبکەن بەکار و کەسابەت".

فەوجی کاکەییەکان لەچوارچێوەی حەشدی بابلیون دامەزراوە بۆ پاراستنی گوندەکانی کاکەیی نشین لەداقوق و سەرەتا ژمارەیان 300 چەکداربوو.

هاوشێوەی ئەم فەوجە چەند هێزێکی دیکەی حەشد لەسنوری کەرکوک هێشتا مووچەیان لەلایەن دەستەی حەشدی شەعبی عێراقەوە بۆ خەرجنەکراوە.

وەسفی عاسی یەکێک لەکەسایەتیەکانی عەشیرەتی عوبێد بۆ دابینکردنی مووچەی لیواکەی لەحەویجە، مانگانە بڕی 25 هەزار دینار لەفەرمانبەر و خێزانەکانی عەشیرەتەکەی وەردەگرێت بۆ ئەوەی توانای بەردەوامیان هەبێت لەپاراستنی ناوچەکاندا.

ئەو فەوجانەی دیکەیش کە سەر بەرێکخراوی بەدرن لەلایەن سەرکردایەتی بەدرەوە مووچەیان بۆ دابیندەکرێت و مانگانە بڕی 400 هەزار دینار وەردەگرن.

هۆکاری خەرجنەکردنی مووچەی چەکدارەکانی ئەو هێزانەیش بۆ ئەوە دەگەڕێتەوە کە تازە پێکهێنراون و هێشتا دەستەی حەشد نەیتوانیوە رەزامەندی خەرجکردنی مووچەیان بۆ وەربگرێت لەلایەن حکومەتەوە.

ئومێد حسێن دەڵێت: "هەوڵماندا لەنێو کاکەییەکاندا مووچەی چەکدارەکان دابین بکەین بەڵام ئەو کەسانەی ئامادەی هاوکاریکردن بوون پەنجەی دەستیان تێنەدەپەڕاند، هۆکارەکەشی ئەوەیە زۆربەی کاکەییەکان سەر بە لایەنێکی سیاسی کوردین و ئێمە بەخاین دەزانن".

لەماوەی رابردووشدا بەهەمان شێوە فەوجەکە هەڕەشەی کشانەوەی کرد لەسەنگەرەکان بەڵام بەهۆی هەڕەشەکانی داعشەوە ئامادەنەبون بەڵێنەکەیان جێبەجێبکەن، وەکو فەرماندەی فەوجەکە ئاماژەی بۆکرد.

ئەوەش دەخاتەڕو کە لەئێستادا مەترسی داعش کەمبووەتەوە بەهۆی ئەوەی پۆلیسی ئیتیحادی کەوتونەتە ئەو دیوی گوندەکانی کاکەیی و ئامێری چاودێری حەراریان داناوە بەڵام دانیشتوانی گوندەکان متمانەیان بەو هێزانە نیە چونکە خەڵکی شارێکی دیکەن.

پ: سیروان محه‌مه‌د



created by Avesta Group and powered by Microsoft Azure